भांगरभूंय | प्रतिनिधी
पांडुरंग गोरे: बलराम निवासी विद्यालयांत मनयली शिवजयंती
काणकोण: हिंदवी स्वराजाची स्थापणूक करपी छत्रपती शिवाजी महाराज हे युगपुरूस आशिल्ले. तांकांच लागून धर्म आनी संस्कृती शाबूत उरली. धाडसी पराक्रम आनी बुद्धीचातुर्याच्या बळार तांणी जुलमी राजवटीक हारोवन न्यायाचें हिंदवी स्वराज स्थापन केलें. शिवाजी महाराजा सारको सर्वगुणसंपन्न असो रयतेचो राजा इतिहासांत अजून जालो ना आनी हाचे मुखारूय जावचो ना अशें जिवनविद्या मिशनाचे आदले अध्यक्ष पांडुरंग गोरे हांणी सांगलें.
आदर्शग्राम पैंगीण हांगासरल्या बलराम निवासी विद्यालय आनी जिवनविद्या मिशन, गोंय प्रदेश हांच्या जोड पालवान शिवजयंती निमतान आयोजीत केल्ल्या सुवाळ्यांत ते मुखेल उलोवपी ह्या नात्यान उलयताले.
ह्या वेळार माचयेर पैंगीणच्यो सरपंच सविता तवडकार, प्रभारी शिक्षिका वंदना गांवकार, जिवनविद्या मिशनाचे गोंय प्रदेश अध्यक्षा राजश्री वायंगणकार, पालक शिक्षक संघाच्यो अध्यक्षा वृंदा वेळीप, उपाध्यक्ष अशोक गांवकार हाजीर आशिल्ले.
सुरवेक मानेस्तांनी छत्रपती शिवाचजी महाराजांचे प्रतिमेक फुलांहार घालून पुजा केली. ह्या वेळार विद्यार्थ्यांनी पाळणा गीत, तशेंज शिवाजी महाराजांचेर आदारीत नाच सादर केले.
शिक्षक संजय गांवकार हांणी आपल्या प्रास्तावीक उलोवपांत बाल शिवाजीच्या जिणे वयले प्रसंग सांगलें. शिक्षिका वंदना गांवकार हांणी मानेस्तांक येवकार दिलो. शिक्षिका भक्ती नायक हांणी आकर्शक रांगोळी सजावट केल्ली. सुत्रसंचालन विद्यार्थिनी अर्चना झोरे हाणें केलें. जाल्यार शिक्षिका फेनी फर्नांडीस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
