भांगरभूंय | प्रतिनिधी
म्हजें मत
हालींच छत्रपती शिवाजी महाराजांची जयंती जाली. गोंयभर विवीध कार्यावळी मनयल्यो. मात, तांचे आदर्श सहसा कोण घेनात. तांच्या विचारां प्रमाण वागनात. खरें म्हणल्यार तांचो आदर्श तरणाटे पिळगेन घेवपाक जाय. बायल ही उपभोगाची वस्त न्हय, असो निर्णय सर्वोच्च न्यायालयान कांय वर्सां पयलीं दिल्लो. मात, छत्रपती शिवाजी महाराजान 400 वर्सां पयलींच असो निकाल दिल्लो. ते फकत 15 वर्सा पिरायेचे आशिल्ले, तेन्नाची ही गजाल. ते रांझे गांवांतल्यान वतना घोड्यांच्या टापांचा आवाज आयकून गांवांतलो एक मनीस धांवत आयलो. ताणें महाराजांचे पांय धरले. ताणें न्याय मागलो. ताणें म्हणलें, म्हजे धुवेचेर बलात्कार जाला. महाराज तिडकले. तांणी विचारलें, कोणें केलें हें वायट कर्म? त्या मनशान म्हणलें, गांवच्या पाटलान. शिवाजी महाराजांचे दोळे रागान तांबडे जाले. ते बायलांक आवय समान मानताले.
गांवच्या पाटलाचें हें कर्म हें समजतकच तांणी आपल्या सैनिकांक पाटलाक धरून हाडपाक सांगलें. पाटील आयलो आनी मधांदपणआन उलोवंक लागलो, गांवाचेर पाटलाची सत्ता आसता. तेन्ना चलयेचेर जाल्ल्या बलात्कारा विशीं जाब विचारुंक मेळचो ना. पाटील मात्सो घमेंडीच आशिल्लो.
शिवाजी महाराज थंय सावन गेले. उपरांत तांणी आपले मनीस धाडून पाटलाक धरून हाडलो आनी ताका शिटकायलें, बायल ही देवते समान आसता. बायल ही आवय समान आसता. तिचेर अत्याचार जाल्लो हांव केन्नाच सोंसून घेवचों ना. पूण पाटील तरीय मदांधपणान उलोवंक लागलो. शिवाजी महाराजांनी पाटलाचे हातपाय कापून उडोवपाची ख्यास्त फर्मायली. ती ताकतिकेन अंमलांतूय हाडली.
सांगपाचें म्हणल्यार ह्या प्रकरणाची गवाय दिवपी शिवचरित्राचे अस्सल कागद आसात. साहित्यीक रणजित देसाय हांणी म्हणलां, बायले विशींचो संपूर्ण आदर म्हणल्यार सरंजामशेयेच्या रेंवटांतलें मृगजळ आशिल्लें. आयज जर महाराज आशिल्ले जाल्यार बलात्काराचो एकूय गुन्यांव घडचो नाशिल्लो. हातपांय कापिल्ल्या एक – दोन मनशांची जर धिंड काडिल्ली जाल्यार धा पिळग्यो ताचो धडो घेतल्यो आशिल्ल्यो. संपूर्ण समाज कितें तें समजतलो आशिल्लो. कल्याणच्या सुभेदाराचे सुनेक धरून हाडली तेन्ना तिका पळोवन आवयची याद जाल्ल्या शिवाजी महाराजांचे म्हान विचार नदरे मुखार येतात.
आयज- कालचे वकील शिवाजी महाराजांचो इतिहास वाचतात काय ना? वाचतात जाल्यार ते सर्वोच्च न्यायालयाक सांगतले आशिल्ले, शिवाजी महाराजांची प्रत्यक्ष कथा म्हणल्यार कायदोच आसलो. तो न्यायालयान मानलो जाल्यार देशांत बलात्काराचे एकूय प्रकरण घडचें ना.
शिवाजी महाराज आनी शाहू महाराज हांचे जायते निर्णय हे कायद्या भशेनूच आसात. तांचो अभ्यास करून हे कायदे खरपणान सत्यांत देंवयत जाल्यारूच देशांतली गुन्यांवकारी शुन्याचेर येतली. नाजाल्यार सद्दां वायट कर्मां करपी राकेसांच उदय जायत रावतलो.
– गजानन नायक भाटकार
आल्त परवरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
