भांगरभूंय | प्रतिनिधी
साबार पक्ष, फुडाऱ्यांनी उक्तायल्यो प्रतिक्रिया
मुंबय, खबरां संस्था : बाळासाहेब ठाकरे हांणी मेहनत घेवन उबो केल्लो शिवसेना पक्ष आनी ताचें धनुश्यबाण चिन्न पक्षांतल्यान फुटून गेल्ल्या आमदारांच्या गटाक मेळ्ळें. वेंचणूक आयोगान हो निर्णय घेतलो. आतां ह्या इतिहासाची पुनरावृत्ती घडल्या. शरद पवार हांणी कश्ट घेवन वयर काडिल्लो राष्ट्रवादी पक्ष आनी ताचें घडयाळ हें चिन्न पक्षांतल्यान फुटून गेल्ल्या आमदारांच्या गटाक मेळ्ळां. वेंचणूक आयोगान शिदें शिवसेने प्रमाणूच अजित पवार हांचोच राष्ट्रवादी पक्ष कायदेशीर आसा, अशें म्हणलां. हे घडणुकेचेर महाराष्ट्रांत खवदळ जाला. फुडाराक हो पायंडो पडटलो अशें कांय जाणांक दिसता.
मनसेन हे घडणुकेचेर ट्विट केलां. ‘म्हालगड्या काकान उबो केल्लो पक्ष दुसऱ्यांच्या बळग्याचेर झोमून घेवन सामकें सोंपें. पूण ह्या जाण्ट्या फुडऱ्याचो अपमान करीनासतना स्वताच्या बळाचेर स्वताचो पक्ष उबो करप, ताका चिन्न मेळोवप हे खातीर राज ठाकरे हांचे सारको संघर्श आनी संयम लागता, हिंमत लागता….. आसूं. तांचें राजकारण तांकां बरे दीस दाखोवं.’
उपमुख्यमंत्री देवेंद्र फडणवीस हांणी म्हणलां : राष्ट्रवादी काँग्रेस पक्ष अजित पवार हांकां मेळटलो हाचो आमकां विस्वास आसलो. संख्याबळ तांचे कडेन आसा. २०१९ वर्सा कांय लोकांनी लोकशायेचो कौल न्हयकारिल्लो. लोकांनी दिल्ल्या निकाला कडेन पडमूरपण केल्लें. जांणी लोकशायेचो खून केलो तांकां आयज लोकशायेन तांचो जागो दाखोवन दिलो.
निकाला फाटल्यान ‘अदृश्य शक्ती’ आसा. राजकी संघटना जांचे कडेन तो गट खरो पक्ष. शरद पवारांच्या फाटल्यान संघटना उबी आसा, अशी प्रतिक्रिया खासदार सुप्रिया सुळे हांणी उक्तायल्या.
आमच्या वकिलांनी मांडिल्ली बाजू आयकून वेंचणूक आयोगान आमचे वटेन निर्णय दिलो, ताचो खोस जाता, अशें उपमुख्यमंत्री अजित पवार हांणी म्हणलां. खासदार संजय राऊत हांणीय खूब कडक प्रतिक्रिया दितना मोदी आनी शहा हांचेर आरोप केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
