भांगरभूंय | प्रतिनिधी
वास्को: वेर्णें सावन सुरू जाल्ले शिवशौर्य यात्रेक व्हड उमेदीन येवकार दिलो. कुठ्ठाळी, दाबोळी, मुरगांव, वास्को ह्या चार मतदारसंघांत भोंवले उपरांत यात्र वेर्णें मार्गान मुखार गेली.
छत्रपती शिवाजी महाराज हांच्या 350 व्या राज्यभिषेक वर्सा निमतान तशेंच विश्व हिंदू परिशदेक 60 वर्सां पुराय जाल्ले खातीर शिवशौर्य यात्रेचें आयोजन केल्लें. ही यात्रा वेर्णें चौकांत पावले उपरांत विश्व हिंदू परिशदेच्या मुरगांव प्रखंड तशेंच बजरंग दळा वतीन येवकार दिलो.
वेर्णें चौकांतल्यान सुरू जाल्ली यात्रा क्विनी नगर, बिर्ला, झरी मार्गान दाबोळी चौकांत आयले उपरांत थंय हाजीर आशिल्ल्यांनी येवकार दिलो. उपरांत ही यात्रा दाबोळी विमानतळ, शांतीनगर मार्गान वरुणापुरी चौकांत आयले उपरांत थंय येवकार दिलो. ही यात्रा म्हामार्गान सडा हांगासरल्या दत्तात्रय देवळांत आयली. थंय येवकार दिले उपरांत सडा चौकांत थोडो वेळ रावले उपरांत आमदार संकल्प आमोणकार, नगरसेविका श्रद्धा आमोणकार आनी हेरांनी येवकार दिलो.
ही यात्रा मुरगांव पालिका इमारती मुखार आयली तेन्ना थंय सभा जाली. हे सभेंत निवृत्त प्राचार्य राजेंद्र ठाकूर आनी विश्व हिंदू परिशदेचे कोंकण प्रांताचे सहमंत्री अनिरुद्ध भावे हांचीं उलोवपां जालीं.
हे सभे उपरांत यात्रा दामोदर मंदीर, हुतात्मा चौक मार्गान चिखले शिवाजी महाराज हांच्या पुतळ्या कडेन आयली. थंय थोडो वेळ रावले उपरांत चिखली पंचायती मार्गान सांकवाळे शांतादुर्गा देवळा कडेन गेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
