भांगरभूंय | प्रतिनिधी
भांगरभूंय । प्रतिनिधी
पणजी : छत्रपती शिवाजी महाराज, गोंय, धर्मांतर हाचे वयल्या अॅड. उदय भेंब्रे हांच्या व्हिडियो वयल्यान चलिल्लो वाद आयज आनीक वाडिल्लो पळोवंक मेळ्ळो. साबार जाणांनी अॅड. भेंब्रे हांच्या विधानाक हरकत घेतल्या, तर बऱ्याच जाणांनी तांकां तेंको दिला. बजरंग दलाच्या वावुरप्यांनी पयर केल्ले घडणुके आड पुलीस कागाळ करपाचो निर्णय अॅड. भेंब्रे हांणी घेतला. तर पयर रातीं जाल्ले घडणुकेचो निशेध करपाक नागरिकांनी मडगांवां आयज सांजे निशेध सभा आपयल्या.
सांगलें तें कल्पनेंतलें न्हय : भेंब्रे
घरा सामकार जाल्ले घडणुके आड पुलीस कागाळ करपाचो निर्णय आपणें घेतला, अशें अॅड. भेंब्रे हांणी काल पत्रकारांक सांगलें. आपणें जें कितें सांगिल्लें तें कल्पनेंतलें न्हय. तर ‘पुर्तुगीज आणि मराठे’ ह्या डॉ. पांडुरंग पिसुर्लेंकार हांच्या पुस्तकांतलें आनी गॅझिटियर ऑफ गोवा हातूंतलें. कालचे घडणुके फाटल्यान धर्म राजकारणांत हाडून हिंदू लोकांक खुबळावन घालपाचो यत्न अशें आपल्याक जाणवलें. कारण एकल्यान उलयतना ‘आमी हिंदूंक एकठांय जावंक सोदतात आनी तूं आमकां फोडटा. धर्मांतर, लव्ह जिहादाचेर व्हिडियो कर’, अशें म्हणलें, अशी म्हायती अॅड. भेंब्रे हांणी दिली.
ते भितर आयले. जमाव करून उलयले. हो कायद्याचो भंग. सरकारान हाची दखल घेवंक जाय. कारण हो समाजाचो प्रस्न. आयज म्हजे बाबतींत जें घडलां तें हेरां बाबतींतूय घडपाक शकता. तशें जाल्यार कायदो, सुवेवस्था इबाडूंक शकता, अशेंय तांणी सांगलें.
समर्थना खातीर सांजे सभा
मडगांवां आयज आयतारा 2 मार्चाक चौगुले कॉलेज जंक्शन वाठारांत सां सॅबेस्तियान उक्त्या जाग्यार सांजवेळा 4.30 वरांचेर निशेध सभा जातली. सगल्यांनी ह्या वेळार हाजीर रावचें असो उलो उदय भेंब्रे समर्थक आयोजकांनी मारला.
वेलिंगकार हांची टिका
शिवाजी महाराजांचे गोंयांतले राजवटी विशीं मुख्यमंत्री डॉ. प्रमोद सावंत हांणी केल्ल्या विधानांक हरकत घेवपी उदय भेंब्रे हांचेर हिंदू रक्षा महाआघाडीचे राज्य निमंत्रक सुभाष वेलिंगकार हांणी शेनवारा टिका केली. भेंब्रे हांणी इतिहासीक तथ्यां कुशीक दवरून शिवाजी महाराजा संबंदांत केल्लीं विधानां म्हणल्यार इतिहासा कडेन द्रोह, अशें तांणी सांगलें.
राष्ट्रवादा कडेन संबंदांत विशयांचेर गोंयांतल्या लोकांचो बुद्धीभेद करपाचे नदरेन विधानां करप्यांच्या सुनियोजीत कारस्थानांत गोंयांतले ज्येश्ठ साहित्यीक उदय भेंब्रे लेगीत वांटेकार जाल्ल्याचें पळोवन दुख्ख आनी खंत दिसता. मुख्यमंत्री डॉ. सावंत हांच्या विधानांचेर मत मांडटना भेंब्रे हांणी इतिहासीक तथ्यां कुशीक दवरून गोंयचें दैवत आशिल्ले छत्रपती शिवाजी महाराजां विशीं हरकत घे सारकीं आनी फटीचीं विधानां केल्यांत. ह्या विधानांचो आनी ते फाटले हळशिकावणें वृत्तीचो आपूण खर विरोध करतां, अशें वेलिंगकार हांणी म्हणलां.
शिवराय हे पुर्तुगेजांचे इश्ट आशिल्ले. तांणी पुर्तुगेजांक धांवडावन घालपाचो केन्नाच यत्न करूंक ना. बार्देसा वयल्या आक्रमणा वेळार तांणी बायलां – भुरग्यांक उखलून व्हेलीं. तीन निरपराध पाद्रींक जिवेशी मारले, शिवरायान गोंयाचेर केन्नाच राज्य करूंक ना, अशीं जीं विधानां भेंब्रे हांणी केल्यात, तीं फकत राष्ट्रवादी गोंयकारां कडेन केल्ली प्रतारणा न्हय, जाल्यार इतिहासा कडेन केल्लो द्रोह आसा, अशेंय वेलिंगकार हांणी उजवाडायिल्ल्या पत्रकांत म्हणलां.
पुरावे दिवन भेंब्रे हांचे दावे खोडात : विजय
शिवाजी महाराज हांचे विशीं उदयबाब हांणी केल्ल्या विधाना उपरांत बजरंग दलाच्या कार्यकर्त्यांनी शुक्रारा रातीं तांच्या घरा वचून तांकां जाब विचारिल्लो. ताचे वयल्यान गोवा फॉरवर्डाचे अध्यक्ष तशेंच आमदार विजय सरदेसाय हांची शेनवारा भेंब्रे हांची भेट घेतली. उदयबाब सदांच पुरावे दिवन उलयतात. शिवाजी महाराजां विशीं तांणी केल्ले दावे जांकां पटनात, तांणी ते पुरावे दिवन खोडून काडचे. रातच्या वेळार एका जाण्ट्या मनशाच्या घरांत वचून वाद घालप चुकीचें आसा. गोंय हें गोंय उरिल्लें आमकां जाय, हांगा यूपी, बिहारा सारकी परिस्थिती जाल्ली आमकां नाका अशें सरदेसाय हांणी स्पश्ट केलें.
शिवरायांचो अपमान : गिरीराज
आमदार विजय सरदेसाय हांणी उदय भेंब्रे हांची भेट घेवन केल्ल्या विधाना वयल्यान भाजपाचे म्हणयारे गिरीराज पै वेर्णेंकार हांणी सरदेसाय हांचेर टिका केल्या. शिवाजी महाराज वा तांच्या सैन्यान गोंयांतल्यान बायलांक उखलून व्हेलीं, अशे तरेचीं विधानां करून भेंब्रे हांणी शिवरायांचो अपमान केला. भेंब्रे हांच्या अशे तरेच्या विधानांचें सरदेसाय समर्थन करता काय कितें, असोय प्रस्न तांणी उपस्थीत केला.
जालें तें वायट जालें : मावजो
जें जालें तें वायट. मस्ती करून. हें दुख्खदिणें. उदयबाबान मनाक आयलां तें सांगूंक ना. ते मुद्देसूद उलयतात. असल्यो घडणुको वाडल्यार गोंयचो एकचार, समाजीक वीण ना जातली, अशें ज्ञानपीठकार दामोदर मावजो हांणी सांगलें.
उदयबाब वंदनीय : संदेश
स्वराज्य हाडपी शिवाजी महाराजाचेर उलोवपाचो अधिकार उदयबाबाकूच आसा. तांणी स्वराज्य म्हणल्यार गोंयकारांचें स्वताचें राज्य हाडपाक ते पयलीं सावन वावुरल्यात. ताका लागूनच आमी आयज हांगा आसात. शिवाजी महाराजांची स्वराज्याची संकल्पना मुखार व्हरपाचेंच काम तांणी केलें, अशें पत्रकार संदेश प्रभुदेसाय हांणी सांगलें.
कोंकणी भाशा मंडळाचो तेंको
लोकशायेंत मांडिल्ले विचार पटनात जाल्यार तांचेर वैचारीक मांडणेंतल्यान परतून जाप दिवप म्हत्वाचें आसता. अशें आसतनाय उदय भेंब्रे हांणी छत्रपती शिवाजी महाराजां विशीं केल्ल्या विधानां उपरांत शुक्रारा रातीं वेळार एका 85 वर्सांच्या ज्येश्ठ नागरिकाच्या घरा भायर शाब्दीक हल्लो केलो, हे घडणुकेचो आपूण निशेध करतां. विचारांचो फरक आसतलो, दुसऱ्यांचे विचार आयकप, पटना जाल्यार विचारांनीच ते खोडून काडप, अशें कोंकणी भाशा मंडळाची अध्यक्ष रत्नमाला दिवकार हांणी सांगलें.
गोंयच्या हिताच्या प्रस्ना खातीर तरणाटेपणा सावन ते आतां मेरेन ते वावुरल्यात, उलयल्यात, तांणी बरयलां. ह्या संबंदांत आयज आयतारा निशेध सभा आयोजीत करतले. पयरचे घडणुके विशीं अजून कांय प्रतिक्रिया सरकारा कडल्यान येवंक ना. लोकशाय आमकां विचार उक्ते करपाचो अधिकार दिता. ते पटना जाल्यार आपलें म्हणणें मांडपाचो अधिकारूय लोकशाय दिता, सरकारान ह्या लोकांचेर कारवाय करची, अशेंय तांणी सांगलें. कोंकणी राखणदार मंचाचे अध्यक्ष प्रकाश नायक हांणी हे घडणुकेचो निशेध केलो. ह्या लोकांक इतिहास खबर ना. शिवाजी महाराजान धर्मांतर आडायलें केन्ना, असो प्रस्न तांणी केलो. हिंदूंची ह्या लोकांक कोणे मक्तेदारी दिल्या, असो प्रस्न करून कोंकणीमोगी उदयबाबा फाटल्यान उबे रावतले. ह्या लोकांक बेगीन अटक जावंक जाय, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
