भांगरभूंय | प्रतिनिधी
इतिहास अभ्यासकां मदीं लेगीत छत्रपतीं विशीं तरेकवार मतां
भांगरभूंय । प्रतिनिधी
पणजी : सत्तरी, दिवचल, बार्देस, फोंडें, काणकोण, सांगें ह्या म्हालांत शिवाजी महाराजांची राजवट आशिल्ली, मुख्यमंत्री डॉ. प्रमोद सावंत हांच्या ह्या विधानाक लागून एक नवो वाद तयार जाला. गोंयांत शिवाजी महाराजांची राजवट केन्नाच नाशिल्ली, अशें अॅड. उदय भेंब्रे हांणी म्हणलां. मुख्यमंत्र्यांचें विधान चुकीचें आशिल्ल्याचें तांणी एका व्हिडीओंत म्हणलां. इतिहासाचे अभ्यासक सचीन मदगे आनी संजीव सरदेसाय हांणी मात मुख्यमंत्र्यांचें विधान योग्य आशिल्ल्याचें सांगून छत्रपती शिवाजी महाराजांची राजवट आशिल्ल्याचें मत उक्तायलां. हाका लागून गोंयांत एक नवो वाद तयार जाला.
फाटल्या सप्तकांत 19 फेब्रुवारीक गोंयांत व्हडा दबाजान शिवजयंती उत्सव मनयलो. फर्मागुडी मुखेल कार्यावळ जाली. सांखळी, दिवचल, म्हापशें, वास्को, पणजी ह्या सगळया वाठारांनी कार्यावळी जाल्यो. गोंयांत सगळ्याक सरसकट पुर्तुगेजांची राजवट नाशिल्ली. फोंडें, दिवचल, सत्तरी, बार्देस ह्या म्हालांत छत्रपती शिवाजी महाराजांची राजवट आशिल्ली. तिसवाडी, साश्ट आनी बार्देस ह्या तीन म्हालांत पुर्तुगेजांची राजवट आशिल्ली. हाका लागून या तीन म्हालांनी धर्मांतरण जालें, असो उल्लेख मुख्यमंत्री डॉ. प्रमोद सावंत हांणी केल्लो. चुकीचो इतिहास आमी शिकयतात, अशें तांणी म्हणिल्ले. हाका साहित्यीक आनी जाणकार अॅड. उदय भेंब्रे हांणी हरकत घेवन मुख्यमंत्र्यांचें विधान चुकीचें आशिल्ल्याचो दावो एका व्हिडीओंत केला.
हाचेर इतिहासाच्या अभ्यासकांनी तरेकवार मतां उक्तायल्यात. इतिहासाच्या अभ्यासकां मदीं लेगीत हाचेर एकमत ना, अशें दिसून येता.
पुर्तुगेजांक छत्रपतींचो भंय आसलो : संजीव सरदेसाय
राजवट म्हणल्यार शिवाजी महाराजांचें प्रशासन नाशिल्लें. राजकारभार चलोवपा खातीर तांणी अधिकाऱ्यांची नेमणूक करूंक ना. तरी लेगीत बार्देस, दिवचल, फोंडें म्हालांत शिवाजी महाराजांचो दरारो आशिल्लो. महाराष्ट्रा सावन कर्नाटक मेरेन शिवाजी महाराजांचो दरारो आशिल्लो. 1667 त शिवाजी महाराजांनी दिवचल म्हालाक (भतग्राम) भेट दिली. बार्देशांत पुर्तुगीज सैन्या कडेन तांची लडाय लेगीत जाली. पोर्तुगीज सैन्य पळून गेलें. शिवाजी उपरांत संभाजी महाराज लेगीत गोंयांत येवन गेले. मर्दनगड किल्ल्यार (आतांचो फर्मागुडी किल्लो) संभाजी महाराजांनी लडायेंत पुर्तुगीज वायसरॉय कॉर्न द आल्वा हाची हत्या केली. गोंयांत लडाय जावन हत्या जाल्लो हो एकमेव वॉयसरॉय आसा. पुर्तुगेजांक शिवाजी महाराजांची भिरांत आशिल्ली. पुर्तुगीज राजवटींत लेगीत छत्रपती शिवाजी महाराजांचो दरारो आशिल्लो. मुख्यमंत्री डॉ. प्रमोद सावंत हांणी ह्या अनुशंगान हें वक्तव्य केलां आसुयें, अशें संजीव सरदेसाय हांणी सांगलें.
शिवरायांचे राजवटीचो पुस्तकांत लेगीत उल्लेख : सचीन मदगे
गोंयांत शिवाजी महाराजांची राजवट आशिल्ली, असो उल्लेख डॉ. पांडुरंग पिसर्लेकार हाच्या पुस्तकांत लेगीत आसा. शिवाजी महाराजांच्यो पुर्तुगेज सैन्या कडेन लडायो जाल्यात, हाचो उल्लेख आसा. गोंयांत कांय तेंप शिवाजी महाराजांची राजवट आशिल्ली हें मुख्यमंत्री डॉ. प्रमोद सावंत हांचें विधान योग्य आसा, अशें इतिहासाचे अभ्यासक सचीन मदगे हांणी म्हणलां. बार्देस म्हालांत शिवाजी महाराजां कडेन लडाये वेळार पुर्तुगेज सैन्य पळून गेलें. तशेंच मुरगांव दर्यांत पुर्तुगीज नौदळा कडेन शिवाजी महाराजांची लडाय जाली. शिवशाहीर बाबासाहेब पुरंदरे हांणी लेगीत शिवाजी महाराजांच्या गोंयांतल्या राबित्याचो उल्लेख व्याख्यानांत केला. अॅड. उदय भेंब्रे हांचें वक्तव्य चुकीचें आसा, अशें सचीन मदगे हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
