शिवप्रेमींचें देवूळ

भांगरभूंय | प्रतिनिधी

सारके उलयलो. मडगांवां दिगंबरबाब आमचे शेजारी. ते देवांच्या कॉन्टॅक्टांत आसतात. खंयच्या पक्षांत केन्ना वचपाचें आनी केन्ना भायर येवपाचें हें देवूच तांकां सांगता.

(घांट वाजता. पड्डो वयर वता. चारपात्री नाटकाचो अंक सुरू जाता.)
थळ – शंकर, महादेव, नीलकंठ, भोलेनाथ अर्थात शिवजी देवाचे अनुयायी- शिवप्रेमींचें ठिकाण.
पयलें पात्र – सद्या देशांत सगळे कडेन श्रीरामाचो आनी बजरंगबलीचो जयजयकार चलला. तांच्यो जयंत्यो दबाज्यान मनयतात. तांचीं देवळां बांदतात. इतलेच न्हय तर वेंचणूक सभांनी आनी रस्त्यार गो- तस्करांक, चोरांक बडयतनाय जय श्रीरामाचें नांव घेतात. हनुमान चालिसांचे पाठ देवळांतूच न्हय तर आतां रस्त्यारूय चल्ल्यात. ह्या वातावरणांत देवांचो देव महादेवाची दिसान दीस वाडटी उपेक्षा खपोवन घेवप आमकां शिवप्रेमींक कुस्तार जायत आसा.
दुसरें पात्र – जाता तितले बेगीन आमी तांडव करपी मुद्रेंत ना जाल्यार ध्यान मुद्रेंत बशिल्ले स्थितींतली शिवमुर्तीची धाकल्याशा देवळांत प्रतिष्ठापना करून उडोवपाची वेळ आयल्या. तरूच फुडारांत ‘हर हर महादेव’ कानार पडटलें.
तिसरें पात्र – ते खातीर प्रदेश नियोजन मंडळान नवे कायदे, आराखडे चित्रावन सगळे गोंय भायल्यांच्या गळ्यांत देंवोवचे आदी आमच्या इश्ट देवाक म्हामार्गा कुशीक चडांत चड गोंयकारांक आनी भोंवडीकारांक ते दिसचे अशा जाग्यार देवूळ बांदपा खातीर काकुलोसो कुडको जाता तितल्या बेगीन मेळोवपाचो आमी यत्न करचो पडटलो.
पयलें पात्र- बांदकाम म्हणल्यार प्लॅन संमती, पंचायतीचे आनी हेर सरकारी खात्यांचे दाखले हें सगळें लटांबर आयलें म्हणपाचें. ताचे परस रातयां मुर्तीची प्रतिष्ठापना करून मेकळे जाल्लें बरें दिसता.
दुसरें पात्र- दुसऱ्या दिसा पंचायतीन ती मुर्ती बेकायदेशीर थारावन तिका हालोवपाचो निर्णय घेतल्यार कितें करपाचें, सायबा?
तिसरें पात्र- भिवपाची कांय एक गरज ना. “बम भोले की मुर्ती को हटा रहे है” म्हूण बोवाळ करपाचो.
पयलें पात्र- हांगा मदींच हिंदी खंयच्यान रे आयली? फकांडां मारता काय कितें?
दुसरें पात्र- बाबा रे आयज गोंयांत भितरले- भायले करत शिवप्रेमींची संख्या वाडल्या. शिवरात्री दिसा पर्वतार शिवाच्या मंदिरांतल्या हजारांच्या घिट्टींतले ‘बम भोले, बोल बम’ गजर करपी 90 टक्के बिहार, झारखंड आनी उत्तर प्रदेशांतले आसतात. गोंयकार आनी बंदोबस्ताक आयिल्ले पुलीस धरून उरिल्ले 10 टक्के. भोलेनाथ खतरे में है म्हणल्यार ते काम- धंदे सोडून पंचायतीक घेराव घालपाक येतले.
तिसरें पात्र- उपरांत पुलिसांक पंच, सरपंचांक संरक्षण दिवपा खातीर पंचायत कार्यालयाक कुलूप ठोकचें पडटलें. नाईलाज जावन दबावा खाला पंचायतीक आपलो निर्णय फाटी घेवन भोलेनाथाक संमती दिवची पडटली.
दुसरें पात्र – ताचे उपरांत देव पावसांत भिजता म्हूण बोवाळ करत एक तात्पुरती शेड बांदल्यार कोणाचोय विरोध आसचो ना. मागीर पत्रे लावन भितरलें भितर देवूळ बांदून उडोवपाचें.
पयलें पात्र – इतिहास बदलपा खातीर देशांत सरकारांय ह्या दिसांनी चडांच चड देवळां बांदपाचे बाजून आसात आनी बांदकामांत स्वताय फुडाकार घेतना दिसतात. सरळ आमदाराच्या हातान उक्तावण केलें जाल्यार सगळेच प्रस्न सुटावे जातले. खरेंच भिवपाची गरज उरची ना. घडये स्वताचे दुडू मोडून मंदीर बांदिल्ले खातीर आमची तोखणाय आनी सत्कार जायत.
तिसरें पात्र – हांगा थंय दस्तावेज, फायली नाचयत दीस वगडावचे परस ही खरी बेस बरी आयडिया. आदल्या तेंपार शहाजहानान ताजमहाल बांदता आसतना ताणें बांदकामाचे प्लॅन पास करून घेतिल्ले व्हय?
दुसरें पात्र – अरे प्रियोळकारा, हें सांग, प्रियोळकारांचो आनी शाहजहानाचो संबंद कसो रे? शाहजहानान ताजमहाल बांदता आसतना टॅण्डरा मागोवंक नाशिल्लीं हें खंयच्याय इतिहासकाराक खबर नाशिल्लें गुपीत तुमच्याच आमदाराक खबर आशिल्लें. ताजमहालाचो प्लान नाशिल्लो हें आतां तूं सांगता?
पयलें पात्र – मोगल राजवट आनी गोंयचे प्रियोळ हांचो संबंद कितें तें खणून काडून त्यो खुणो पुसून उडोवपाचो वेळ आयिल्लो आसा.
दुसरें पात्र- आरे. आमचो बुदवंत इतलो वेळ कित्याक तोंडाक कुलूप लावन बसला? बाबा, कितें आसा तें एकदाचें सांगून मेकळो जा पळोवया. म्हातारपणांत घुस्मटमार काळजा खातीर वायट.
बुदवंत पात्र – हें पळयात, आमच्या इश्ट दैवतांचीं देवळां, महानायकांचे पुतळे हांचें बांदकाम, स्थापना धडधडीत सूर्यदेवाचे साक्षीन भर उजवाडांत सगळ्या लोकां हुजीर कायदेशीरपणान जावप हें केन्नाय योग्य. लोकांच्या नदरे आड रातच्या काळखाचो फायदो घेत लिपून करतात ती कृत्यां चडशी बेकायदेशीर आनी अनितीक आसतात. खरें म्हणल्यार त्या देवाचो आनी महानायकाचो अपमानूच म्हणूं येता. आनी हीं असलीं कारस्थानां केले उपरांत आपल्या अधिकारा नुसार तांचे आड कायदेशीर कारवाय करपी सरकारी अधिकाऱ्याक धमकी दिवप हे गुन्यांवकारी कृत्य तशेच आंदोलनकार्‍यांनी सरकारी संस्थेचे इमारतीचेर फातर शेंवटून हारशे फोडप ही देशाचे संपत्तीची नासधूस करप हीं देशविरोधी कृत्यां. कसलेंय कृत्य कायद्याचे चौकटी भितर रावन करप योग्य. धर्माच्या नांवार कायदो हातांत घेवप समा न्हय. विचार करात.
दुसरें पात्र- हिंदू बहुसंख्यक देशांत आमच्या हिंदू आराध्य देवाचें देवूळ बांदपाच्या कामांत कोणेंय आडमेळी हाडप हें आमकां मान्य ना.
बुदवंत पात्र – हिंदू राष्ट्र संकल्पनेचें गृहीत धरले तरी हाचो अर्थ खंयचेय हिंदू संस्थेन धर्म, संस्कृतायेच्या नांवार आपल्या मनाक मारता तशे कायदे मोडून मनमानी करत बेंबदशायीन वागप असो जायना. इतिहासांत वसाहतवादी मोगल, पुर्तुगेजांनी गाय मारली म्हूण आपणें पाडूक मारचें न्हय.
सुत्रधार पड्ड्या फाटल्यान- (मराठी म्हणींचे कोंकणीत भाशांतर करपाची प्रथा आसा काय ना तें खबर ना. कोंकणी म्हालगडे बरोवपी, कोशकार हांणी मनाक लावन घेवचें न्हय. तशेंच हांगा गोवंशाची हत्या असो उल्लेख आशिल्ल्यान गो-रक्षकांनीय भावना दुखोवन घेवपाची गरज ना)
तिसरें पात्र- तशे जाल्यार आमी मुगल आनी पुर्तुगेज काळांतल्यो खुणो कश्यो मिटयतले?
बुदवंत पात्र- दुसऱ्या धर्मांचो दुस्वास करपी इतिहासांतल्या ज्या वसाहतवादी राजवटींच्यो हिंसक, जाचक अत्याचारांच्यो खुणो आमी पुसपा खातीर भायर सरल्यात तसल्योच खुणो आमचे वागणुकेन भविश्यांतल्या इतिहास बरोवप्या खातीर तयार करपाक भायर सरल्यात, अशें दिसपाक लागलां.
पयलें पात्र- बुदवंत म्हणटा ते बरोबर. संस्कृताये संबंदीत, देव धर्म संबदीत कृत्य करतात थंय हिंसा, बळजबरी, नासधूस करप, धमकी दिवप, फातर मारप, कायदे मोडप हे समाजा मुखार आनी चड करून फुडले पिळगे मुखार आदर्श अशें उदाहरण प्रस्तूत करना हें आतां पटपाक लागला. हातूंतल्यान मार्ग देवानच दाखयल्यार बरें जातलें सायबा.
तिसरें पात्र- सरळ देवाकूच गाराणें घाल्यार कशें कितें?
दुसरें पात्र – सारके उलयलो. मडगांवां दिगंबरबाब आमचे शेजारी. ते देवांच्या कॉन्टॅक्टांत आसतात. खंयच्या पक्षांत केन्ना वचपाचें आनी केन्ना भायर येवपाचें हें देवूच तांकां सांगता.
बुदवंत पात्र – आरे पात्रांव, ताका मंत्रीपद दिलें ना मरे.
दुसरें पात्र – बुदवंता, हें पळय एक म्हणल्यार तूं जर पात्रांव, पात्रांव म्हणत रावलो जाल्यार पुर्तुगेज राजवटीच्यो खुणो आमी पुसपाक पावचे नात. आनी दुसरे म्हणल्यार घडये मंत्रीपदाचो प्रस्न देवाक विचारपाक दिगंबरबाब विसरलो आसुंये. बाबा रे, देवा मुखार कोट्यांनी लोक प्रस्न घेवन उबे आसतात. देवा लागीं वेळ कमी आसता. देव सगळें सविस्तर भविश्य सांगपाक बसना. हय काय ना तितलीच हिण्ट दिता.

(‘हय सायबा’ च्या गजरांत सगळीं पात्रां उबीं रावतात आनी पड्डो सकयल देंवता.)