भांगरभूंय | प्रतिनिधी
पणजी ः फर्मागुडी – फोंड्यां 19 फेब्रुवारीक आयोजीत राज्य पांवड्या वयल्या छत्रपती शिवाजी महाराज जयंती सुवाळ्या निमतान राज्य सरकाराच्या म्हायती आनी प्रसिद्धी खात्या वतीन ‘छत्रपती शिवाजी महाराजांची जीण आनी कार्या’चेर हायस्कुल आनी उच्च माध्यमिक विद्यार्थ्यां खातीर अखील गोंय नाट्य प्रवेश सर्त आनी आंतर महाविद्यालयीन प्रस्नमंजूशा सर्तीचे आयोजन केलां. ही सर्त सकाळीं 9 वरां सावन फर्मागुडीच्या श्री गणपती देवस्थानाच्या वाठारांत जातली.
नाट्य प्रवेश सादरीकरणा खातीर चडांत चड 7 मिनटांचो वेळ मेळटलो. नाट्य प्रवेश सर्तींत जैतिवंत पंगडांक पयलें 10 हजार, दुसरें 7 हजार आनी तीसरें 5 हजार रूपया अशी तीन रोख इनामां आनी प्रशस्तीपत्र भेटयतले.
आंतर महाविद्यालयीन प्रस्नमंजूशा सर्तींत दरेक महाविद्यालयांतल्यान दोन विद्यार्थ्यांक वांटो घेवपाक मेळटलो. पयली सर्तका खातीर मुळावी फेरी जातली आनी निमणे फेरी खातीर पांच पंगडाची निवड जातली. सर्तीच्या जैतिवंतांक पयलें रोख 7,500/- रूपया, दुसरें 5,000/- रूपया आनी तिसरें 3,000/- रूपया आनी प्रशस्तीपत्र भेटयतले. तशेंच दरेकी 500/- रूपयांची दोन उमेद वाडोवपी इनामां भेटयतले.
नाट्य प्रवेश सर्त आनी आंतर महाविद्यालयीन प्रस्नमंजूशा सर्तींत वांटो घेवपाक इत्सुक आशिल्ल्यांनी आपल्यो प्रवेशिका 18 फेब्रुवारी पयलीं म्हायती आनी प्रसिद्धी संचालनालय, उद्देग भवन, पणजी गोंय हांगा दिवच्यो. चड म्हायती खातीर श्याम गांवकार 9422444624 हांचे कडेन संपर्क करचो, अशें आयोजकांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
