भांगरभूंय | प्रतिनिधी
पणजी : पावसाळी अधिवेशनाच्या पांचव्या दिसाचें कामकाज सुरू जावचे पयलीं मुख्यमंत्री डॉ. प्रमोद सावंत हांणी विधानभवना भायर जमिल्ल्या पत्रकारां कडेन संवाद सादलो. तांणी सांगलें, कोण कितें म्हणटा हाचें म्हाका पडून गेल्लें ना. म्हादय खाती जें कितें करचें पडटलें तें करीत रावतलों. शिवकुमार जें उलयतात ताका कांयच अर्थ ना. ते तांची संस्कृती दाखयतात. म्हाका तांचें कांयच पडून गेल्लें ना, अशें मुख्यमंत्र्यान म्हादय न्हंय वळोवपाच्या विशयाचेर कर्नाटकाचे उपमुख्यमंत्री डी. के. शिवकुमार हांणी केल्ल्या वक्तव्याक जाप दितना सांगलें.
गोंय आनी कर्नाटकांतल्या म्हादय उदकाच्या वाटपावेल्यान बरींच वर्सां जालीं वाद सुरू आसा. कर्नाटक सरकारान हालींच म्हादयचें उदक वळोवपाचो यत्न सुरू केल्ल्यान परत ताण निर्माण जाला. हे फाटभूंयेर मुख्यमंत्री सावंत हांणी खर भुमिका घेतली. हे विशीं स्पश्ट करतना मुख्यमंत्र्यान म्हणलें, म्हादय विशीं गोंयचे हक्क समृद्ध दवरपा खातीर ही लढाय कायमची चालूच उरतली. राजकीय टिका केली वा कोणेंय कितें म्हणलें तरी गोंयच्या हक्काच्या उदका खातीरची लढाय बंद उरची ना. ती चालूच उरतली.
कर्नाटकाच्या उपमुख्यमंत्र्यांचें तें वक्तव्य
कर्नाटकच्या म्हादई प्रकल्पा विशीं केंद्रीय पर्यावरण मंत्रालय परवानगी दिवचें ना, ह्या गोंय सरकाराच्या वक्तव्याचेर कर्नाटकचे उपमुख्यमंत्री डी. के. शिवकुमार हांणी काल टिका करीत म्हणलें, कर्नाटक सरकार सर्वोच्च न्यायालयांतल्यान अर्ज फाटीं घेवन म्हादयचेर धरणांचें काम सुरू करतले. लवादाच्या निवाड्या प्रमाण आमी कामाच्यो निविदा काडपाची प्रक्रिया सुरू केल्या. आमकां कोणूच आडावपाक शकना. तशेंच कर्नाटक आतां प्रत्यक्षांत म्हादयचें काम सुरू करतलें, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
