भांगरभूंय | प्रतिनिधी
गोंय कला आनी कलाकारांची भांगराळी खण. गोंयच्या कलेची आनी कलाकारांची तोखणाय फकत गोंयांत न्हय तर हेर राज्यांनी लेगीत जाता. गोंयच्या दरेका घरांत आमकां सहज एखादो कलाकार पळोवंक मेळटा. पेडणें ते काणकोण मेरेन कलाकारान भरिल्लें गोंय आयज आंतराष्ट्रीय पांवड्यार लेगीत नामना मेळोवपाक लागलां, ही एका गोंयकारा खातीर अभिमानाची गजाल.
तुमी जायत्या फावटी वेगवेगळी शिल्पकला पळयल्या आसतली. ती पळोवपाक भोव सोबीत दिसता, पूण त्या भायर ती करपाक तितलेंच कश्ट घेवचे पडटात. खास करून जर शिल्पकला एका ल्हानांतल्यान ल्हान वस्तूंचेर केली जाल्यार कलाकाराक ती साकारपाक कितलें पासियेंश आसप गरजेचें हें म्हज्यान आनी तुमच्यान सांगप भोव कठीण. जो करता ताका कळटा. असोच एक कलाकार मुळ काणकोणचो, पूण तळावली- फोड्यां रावपी बिंदीराज सुभाष पागी. हालींच तांणी मल्लिकार्जुन देवाचे जात्रे निमतान तांदळाचो वापर करून केल्ली कलाकृती तुमी पळयल्या आसतलीच. तांदळाक वेगवेगळ्या तापमानाचेर भाजून साकारिल्ली ही कलाकृती पळोवपाक भोव सोबीत दिसता. ही कलाकृती करपाक ताका सुमार 38 वरां लागली.
‘म्हाका भुरग्यांपणातल्यान शिल्पकला करपाची आवड आशिल्ली आनी जेन्ना हांव नवोदयांत शिकतालों तेन्ना कला शिक्षकान कलाकृतींत बरें वा कलाकृतींत रूची आशिल्ल्या विद्यार्थ्यां खातीर वेगवेगळे वर्ग आसताले. थंय कले विशीं मुळावी गजाल शिकयताले थंयच्यान म्हाका हाची आवड निर्माण जाली. जसो- जसो हांव व्हड जायत गेलो तसो- तसो इंटरनॅटार जे वेगवेगळें कलाकृती करतात तसो आपूण लेगीत ती शिकची हो हेतू बाळगून हांवें हाची सुरवात केली. संवय म्हणून हांवें जायतीं चित्रकला, शिल्पकला केल्यांत,’ अशें ताणें सांगलें.
शाळेंत आनी कॉलेजींत वेगवेगळ्या सर्तींनी वांटो घेतला आनी 2014- 15 वर्सां कला अकादेमी आयोजीत सत्तरी तालुको भुरग्यांच्या चित्रकला सर्तींत ताका पयलें इनाम फांवो जालां. उपरांत 2017 वर्सा ताणें सुमार 5000 बाटलेच्या बुचांनी गणेश देखावो तयार केल्लो. हीं बुचां वा धांपणी जीं ताच्या कुटुंबान वेगवेगळ्या दुकानांतल्यान एकठांय केल्लीं. ती मूर्त सुमार चार फूट उंचायेची आसली. ते उपरांत तांणी 2018 वर्सा सुमार 5 फूट उंचायेचो कागदाचो गणेश देखावा केलो.
2019 वर्सा श्री जरेश्वर सर्वजनिक गणेशोत्सव मंडळ फोंडें हांगा सुमाच्या (नाल्लाची दोरी) आदारान आठ फूट उंच गणेश देखावो तयार केला. 2020 वर्सा ताणें कागदाच्या क्विलिंगाचो गणेश देखावा केला, जो सुमार 4.5 फूट उंच आसा. तो ताच्या (bindiraj pagi artwork) ह्या युट्युब चॅनलाचेर अपलोड केला. 2022 नवरात्रीच्या दिसांनी तांणी नव्या संकल्पनेन कावी कले सारकी चित्रकला सुरू केली म्हळ्यार तो देवळांत वचून थंय प्रार्थना केल्या उपरांत येतना थोडी माती जी देवतेच्या चित्रकलेंत वापरताली ती एकठांय करतालो. तशेंच ताणें श्री पार्वती – श्री मल्लिकार्जुन देवूळ काणकोण, श्री शांतादुर्गा फतर्पेकान्न- फातर्पें, श्री शांतादुर्गा कुंकळकान्न- फातर्पें, श्री लयराई – शिरगांव, श्री महालक्ष्मी – बांदिवडें, श्री नवदुर्गा– मडकय, श्री शांतादुर्गा– कवळें, श्री कामाक्षी – शिरोडा, श्री शांतादुर्गा– सांकवाळ गोंयांतल्या ह्या णव वेगवेगळ्या देवळांनी भेट दिल्या. उपरांत 2021 श्रावणांत ताणें दर सोमारा एक रेखाटन रंगोवपाचो नित्यनेम सुरू केलो जें तो दर सोमारा करता जातूंत एक तर माध्यम वेगळें वा साहित्य वेगळें आसता.
हालीच ताका युवा आदिरंगोत्सव 2023 रांगोळी सर्तींत तिसरें इनाम फांवो जालां. सरकारी पॉलिटेक्निकांत डिप्लोमाची पदवी मेळोवन कलेच्या मळार पर्जळपी बिंदीराज सुभाष पागी हाच्या इंस्टाग्राम पेजीर तुमका ताच्यो कलाकृती पळोवंक मेळटल्यो. आमच्या जाणट्यांनी तिगोवन दवरिल्ल्या कलेक आयचे पिळगेन मुखार व्हरपाक जाय, ती सांबाळून दवरपाक जाय, अशें बिंदीराज हाणें सांगलें.
विष्णू नार्वेंकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
