भांगरभूंय | प्रतिनिधी
केरी- सत्तरीः शिरोली केरी- सत्तरीचो कानालाचेर आशिल्लो सांकव धोकादायक जाला. ताचो आतां कठडो कोसळ्ळा. हो पुराय सांकव मोडपाक पावला. ह्या सांकवा वयल्यान वचपी अवजड गाडयो ह्या सांकवाक आनीक धोको निर्माण करतात.
शिरोली केरी सावन विर्डी, तळेखोल, दोडामार्ग वाठारांत वचपा खातीर हो रस्तो सोयीचो आशिल्ल्यान खूबश्यो गाडयो ह्या मार्गान येरादारी करतात. ह्या सांकवाच्या कठड्याक एकदां गाडयेन धपको दिल्ल्यान कांय प्रमाणांत तो कोसळिल्लो. ते उपरांत ताची दुरुस्ती केल्ली. तो कठडो उणें उंचायेचो आसा. थंय हे आदीं खूबशे ल्हान- व्हड अपघात जाल्यात.
घोटेली सावन येवपी आनी शिरोली सावन येवपी रस्ते थंय एकठांय जातात, हे खातीर थंय अपघात जातात. कांय जाण अपघात जावन कानालांत लेगीत पडल्यात. हो सांकव फक्त दुचाकी आनी ल्हान चारचाकी गाडयां खातीर बांदिल्लो. पूण ताचे वयल्यान दर दिसा खूबशे अवजड ट्रक खडी घेवन वतात. ह्या ट्रकांक लागून सांकवाक धपके बसतात. सांकवाक पोंदच्यान वेंरो गेल्यात. कांय कुडके लेगीत पडल्यात. सांकवाचे वारांव कळमल्यात. रातच्या वेळार ह्या सांकवाच्या कठड्यांचो अदमास येना. थंय एकादी व्हड दुर्घटणा घडचे आदींच संबंदितांनी उपाय येवजण करची, अशी लोकांची मागणी आसा. हो सांकव कोसळ्ळो जाल्यार विर्डी, तळेखोल, हद्द, गडगीलवाडी, दोडामार्ग वाठारांत वचपी लोकांचे हाल जातले. थंय वचपाक दुसरो पर्यायी मार्ग हो खुबूच पयसुल्लो थारतलो. ह्या गांवांतल्या लोकां कडलो संपर्क तुट्टलो. संबंदीत अधिकाऱ्यांनी ह्या सांकवाची पळोवणी करची तशेंच ह्या सांकवा वयल्यान जावपी अवजड गाडयांची येरादारी बंद करची, अशी लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
