भांगरभूंय | प्रतिनिधी
म्हापसा : शिरसय आयज सकाळीं जाल्ल्या अपघातांत अनिकेत उदय बुगडे (२७, अस्नोडें) ह्या मोटरसायकल चलोवपी तरणाट्याक मरण आयलें. थिवी रेल्वे स्टेशना वेल्यान घरा वतना हो अपघात घडलो. गस्तीवेळार कोलवाळ पुलिसांक हो तरणाटो रस्त्या कुशीक दुचाकी वांगडा पडिल्लो दिसून आयलो. पुलिसांनी रोखडोच ताका म्हापशें जिल्लो हॉस्पिटलांत दाखल केलो. थंय दोतोरांनी ताका मरण आयिल्ल्याचें सांगलें.
अनिकेत मोटारसायकली वेल्यान थिवी रेल्वे स्टेशना कडल्यान घरा वतालो. रेल्वे स्टेशनावेल्यान सुमार ५०० मिटरावेले शिरसय ग्रामपंचायत घरा लागसारच्या वोल्ताचेर दुचाकीवेलें नियंत्रण सुटलें आनी दुचाकीची रस्त्या शेजारच्या वीज खांब्याक धपको बसलो. ह्या अपघातांत गंभीर जखमी जावन अनिकेताक जाग्यारूच मरण आयलें.
अपघाताचो पंचनामो कोलवाळ पुलीस उपनिरिक्षक दत्तराज राणे आनी हवालदार सीताराम चोडणकार हांणी केलो. अनिकेत हो पर्यटक टॅक्सी ड्रायव्हर आशिल्लो. अस्नोडेंच्या महिंद्रा हॉटेला खातीर तो गाडी चलयतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
