भांगरभूंय | प्रतिनिधी
सकाळीं च्या बरोबर आईन गणूक बशयेंत शिरो दिलो. शिरो पळोवन गणू वाजेलो. “आई गे आयज म्हाका शिरवळ्यो खावपाक जाय” असो हट्ट धरून बसलो. गणूली आजी रुचीक शिरवळ्यो करताली. ताका आपल्या माईची याद आयली. गणूली माई म्हळ्यार ताची आजी. गणू आपल्या आजयेक माई म्हणटालो. ताणें माईक फोन केलो आनी आपल्याक शिरवळ्यो खावपाक जाय असो फरमान सोडलो. नातवाचें एकुय उतर माई भायर उडयनासली. माई रोखडीच कामाक लागली. शेवगो माळ्यार आसलो आनी माईची पिराय जाल्ल्यान तिका वयर चडपाक जमनासलें. तिणें तांची वावराडी शेवतुबायक उलो केलो ” शेवतु ओ शेवतु, गेली गे घरा?” माईलो उलो आयकताच परतेचे वाटेर आसली शेवतू धांवत आयली” किदें जालें माई”? शेवतून विचारलें ” माई हांसत म्हणपाक लागली “आगो किदें सांगू तुका, सांजे म्हजो नातू येता. नातवान फोन करन शिरवळ्यांचे फरमान काडलां. मात्सो म्हाका माळ्यावयलो शेवगो काडून दी.’’ शेवतू माळ्यार चडलें आनी शेवगो काडून माईक धुवन पुसून दिलो. माळ्यावयल्या हुंदरांनी हें आयकलें. “आयज फेस्ताची मेजवानी “म्हणटा म्हणसर ज्युस्त तांच्या पंगडांतलो भागीलो कोळोहुंदीर पासार जातालो ताच्या कानार ही खबर पडली .भागीलो म्हळ्यार खात्रेचें प्रसारण केंद्र आनी ताच्या कानार कसलीय खबर पडप म्हळ्यार ताचो प्रसार जावपाक वेळ लागना.
जगावयलो सगळ्या खबऱ्यांचो जाणकार आमचो भागीलो. माईल्या पोरसांत केळम्यांचे अटंगें रान. केळम्यांच्या अदीमदीं हुंदरांचो राबीतो. ‘शिरवळ्यांचीं मेजवानी’ ह्या ब्रेकिंग न्यूजाचें थेट प्रसारण केळम्यांनी पावलें. पार्टी फुलोवप कशी? शिरवळ्यांचेर यथेश्ट ताव कसो मारप हाचेर गंभीरपणान हुंदरांनी विचार केलो. माईल्या घरचो नकासो काडलो ताचेर हुंदरांनी बसका घेवन खोलायेन अभ्यास केलो आनी सरयेची कसरत सुरू केली. हुंदीर टोळी करून जळीमळी वाट सोदपाक पावले. रांदचेकुडांत वचपाक साबार रस्ते आसले तरी प्रवास सामको खडतर. दिसा उजवाडा घुरी घालप कठीण आसली तरी सगळ्यांच्यो नदरो चुकोवन किण्ण वाठारांतल्यान आपल्या कामाक लागले. एखादी खाण खणपाक मजूर आसता तशी भुंयगत भिळां मारपाक हुंदरांनी आपली फौज तयार केली. बरेच खोलायेन भिळाची वाट मोकळी करीत ते मुखार गेले.
नकळत भीळ खणटा- खणटा उदकाच्या पायपाचेर धपको बसलो आनी बिळांत पूर आयलो. पुरान सगळे व्हांवून परत भायर पावले आनी शेवटून खळयेंत पडले. कोण रेब्यांत भुचकळ्ळे, कोण रेब्यांत माखत वाट सोदपाक लागले तर कोण खळये देगेर बसता तितले निसरून पडपाक लागले. तळमळे लागिल्ले माळ्यावयले सगळे हुंदीर ताची गत पळयताले तांणी तांकां भायर काडपाक युक्त काडली आनी वयल्यान दोरी सोडली. परत एकदां खळयेंत भुचकळपी हुंदरांनी गाथन करून एकमेकां फाटल्यान वण्टीयले पथारोहणाची सुरवात जाली. हुंदीर जसजशे लागीं पावले तशे माईल्या रांदचेकुडांतल्यान शिरवळ्यांचो वास हुंदरांच्या नाका तोंडांत भरलो. त्या वासान ते आनीक आबूज जाले. सगळ्यांनी हुंगत वाट मोकळी करपाक आनी झेत हाडलो. हेवटेन आपलो नातू येतलो म्हण उमेदीन माई आनी शेवतुबाय शेवगो घुंवडावन शिरवळ्यो काडटाली. शेवग्यांतल्यान फळफळीत शिरवळ्यो निसरताल्यो. माळ्यावयले हुंदीर दोळेभर शिरवळ्यो पळयत लाळ गळयताले. धव्योफुल्ल शिरवळ्यो माईन परादींत केळीच्या पानार सजयल्यो, तोपांत नाल्लाचो रोस असो सुरबूस. माईचो वावर जालो. पूण हुंदरांची कसरत सोंपना. सुर्य अस्तमेंक पावलो तरी हुंदरांची तालीम चालूच.
हेवटेन माईली धूव, नातू, जावंय सगळीं पावलीं. हुंदराच्या प्रयत्नांक येस मेळना. आकूळ पिकूळ जाल्ल्या हुंदरांनी दोरी ताणून धरली ती अचानक अस्कटली आनी हुंदरांची गाथन हेवटेन – तेवटेन शेवटून पडली. माळ्यावयल्या हुंदरांनी कपलार हात मारीत थंयच बसकण मारली. तितल्यान गाडयेचो कोर्नो वाजलो. माईल्या दारांत गाडी थारली. सगळ्यांची जाग आयकतात माळ्या वयले हुंदीर खाची कोनश्यांनी लिपले.
माईलो नातू गणू तर उडयो मारीत भितर धांवलो. माईन ताचो गोड पापा घेत ताची अपुरबाय केली. सगळ्यांनी मेजावयली मेजवानी पळोवन शिरवळ्यो फस्त केल्यो. पोट भरलें तरी शिरवळ्यांनी मन भरलें ना. परत केन्ना शिरवळ्यांचो बेत करूया म्हणत नातवान माईचो निरोप घेतलो.
अतिशा सुर्लीकार
7262849923
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
