भांगरभूंय | प्रतिनिधी
पणजी: खांपो गूंड जेनिटो कार्दोजा सयत सचिन पाडगांवकार आनी प्रसाद कुबल हांकां 2009 वर्सा शिरदोना जाल्ले टोळी झुजा प्रकरणांत दिल्ली तीन वर्सांची सक्तमजुरीची ख्यास्त गोंयांच्या मुंबय उच्च न्यायालयान कायम दवरली. हो निकाल न्या. भारती डांगरे हांणी दिलो. सध्या जेनिटो कार्दोज हो समाजीक कार्यकर्ते रामा काणकोणकार हांचेर जाल्ल्या हल्लो प्रकरणांत बंदखणींत आसा.
ख्यास्त कायम जाली ती घडणूक 10 मे 2009 दिसा शिरदोण दर्यादेगेर घडिल्ली. जेनिटो तशेंच तांचे वांगडी महावीर नाडर, डोम्निक नाझारेथ, सचिन पाडगांवकार आनी प्रसाद कुबल हांचो प्रतिस्पर्धी मिरांड टोळी कडेन बरोच वाद जालो. ह्या वेळार दोनूय गटांतल्या वांगड्यांनी एका शॅका लागसार एकमेकांचेर कंवचेच्यो बाटल्यो आनी सुर्यान हल्लो केलो. ह्या टोळी झुजांत दुसरे टोळयेचे वांगडी संतोष कालेल आनी फ्रान्सिस मॅन्युएल डिसोझा ऊर्फ ‘मिरांड’ ह्या दोगांक मरण आयिल्लें.
ह्या प्रकरणांत जेनिटो तशेंच हेरांचेर खुनाचे आरोप दवरिल्ले. म्हापशेंच्या अतिरिक्त सत्र न्यायालयान सदोश मनीस वधाच्या आरोपा खाला ताका दोशी थारायलो आनी तीन वर्सांची सक्त मजुरी दिल्ली. न्यायालयान हो खून पूर्वनियोजीत न्हय, तर वादांतल्यान घडिल्ल्याचें निरीक्षण नोंद केल्लें. ह्या हल्ल्यांत कार्दोजूय जखमी जाल्लो. ताचे दोग सहकारी निर्दोश मुक्त जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
