भांगरभूंय | प्रतिनिधी
दिवचलः शिरगांवां शेनवारा फांतोडेर जाल्ले खेटाखेटींत ६ जाणांक मरण आयलें. हे विशीं मुख्यमंत्री डॉ. प्रमोद सावंत हांणी दुख्ख उक्तायलां. तांणी सकाळीं घडणूक सुवातेर वचून पळोवणी केली.
जी घडणूक घडली ती सामकी दुर्दैवी आसा आनी तिची उंचेल्या पांवड्यार चवकशी करपाचो आदेश दिला अशी म्हायती मुख्यमंत्र्यान दिली. अशी घडणूक हाचे पयली केन्नाच घडूंक ना, देखून सगळ्यांक धक्को बसला आनी दुख्ख जालां. मरण आयिल्ल्यांच्या कुटुंबांक अर्थीक मजत दितले अशें तांणी सांगलें. तशेंच जखमींचेर बेगोबेग उपचार करपाची सुचोवणी दिल्या आनी सरकारा कडल्यान सगले तरेचे सहकार्य दितले अशेंय मुख्यमंत्र्यान स्पश्ट केलें.
ही घडणूक जाल्लो वाठार सामकोच अशीर आसून दोनूय वटांनी व्हड प्रमाणांत दुकानां उबारतात, तशेंच देंवती- चडाव आशिल्ल्यान लोंकांची थंय गैरसोय जाता अशें निरीक्षण मुख्यमंत्र्यान केलें. हाचे फुडें ह्या वाठांरांत गरजेचे उपाय करपाचो आदेश अधिकाऱ्यांक दिला.
देवस्थान समितीचें स्पश्टीकरण…
देवस्थान समितीचें अध्यक्ष दीनानाथ गांवकार आनी पदाधिकारी हांणी मुख्यमंत्र्याचे हाजिरेंत थळाची पळोवणी केली. ह्या वेळार अध्यक्ष दीनानाथ गांवकार हांणी सांगलें, जी घडणूक घडली ती सामकी दुर्दैवी आशिल्ली आनी अशी घडणूक पयलीं केन्नाच घडूंक ना.
फातोडेर धोंडांच्या दोन गटां मदीं कितें तरी घडलें, व्हड गर्दीक लागून कांय लोक सकयल पडले आनी ताचे उपरांत खेटाखेट जाली. तशेंच एका दुकानांत अचकीत विजेचो शॉक लागलो आनी बोवाळ जालो. हांतूत स जाणांक मरण आयलें आनी जायते जाण जखमी जाले अशी म्हायती दीनानाथ गावकारान दिली. धोंडांनी योग्य जतनाय घेवपाची गरज आशिल्ली.
हजारांनी भक्त आसात आनी तांणी शिस्त पाळपाची गरज आसा. भक्तांची संख्या व्हड आशिल्ल्यान त्या जाग्यार व्हड गर्दी जाली आनी ही दुर्दैवी घडणूक घडली. फुडाराक अशी घडणूक घडची न्हय हे खातीर आमी खर उपाय करपाची तयारी करतले अशेंय दीनानाथ गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
