भांगरभूंय | प्रतिनिधी
राज्यपाल, सभापती हांणी घेतली पिडितांच्या घरच्यांची भेट
भांगरभूंय । प्रतिनिधी
दिवचल : शिरगांवां घडिल्ली दुर्घटणा ही गोंयांतली अशे तरेची पयलीच घडणूक. हे दुर्घटणेक लागून पुराय देशांत दुख्ख उक्तायतात. प्रधानमंत्री नरेंद्र मोदी, राष्ट्रपती दौपदी मुर्मू हांणी दुर्घटणे विशीं दुख्ख उक्तायलां. जांकां मरण आयलां तांच्या घरच्यांच्या दुख्खांत वांटेकार आसा, अशें राज्यपाल पी. एस. श्रीधरन पिल्लई हांणी सांगलें.
राज्यपाल पिल्लई हांणी माठवाडो पिळगांवां शिरगांवचे दुर्घटणेंत मरण आयिल्ले सागर नंदादुर्गी हांच्या घरच्यांची भेट घेवन तांकां भुजवण दिली.
गोंय सरकारान सगळे तरेची मजत जाहीर केल्या. ह्या कुटुंबाक सगळे तरेची मजत करतले, अशें तांणी सांगलें.
मजगतीं, सभापती रमेश तवडकार हांणी लेगीत पिळगांवां भेट दिवन सागर हाच्या घरच्यांक भुजवण दिली.
आपल्या ट्रस्टा वतीन गरजेची मजत दिवपाक आपूण सगळे तरेचो आदार दितलों, अशें सभापती तवडकार हांणी सांगलें. ही दुर्घटणा सामकीच दुखदिणी आनी दुर्दैवी आसा. अशे तरेच्यो घडणुको घडच्यो न्हय हे खातीर सरकार निश्चीत योग्य ती खबरदारी घेतलें, अशेंय तांणी सांगलें.
आमदार प्रेमेंद्र शेट हांणी पिळगांवां वचून सागर हांच्या घरच्यांक भुजवण दिली.
अश्या वेळार आवयचें दुख्ख कितें आसता हाची कल्पना लेगीत करपाक जायना. जी घडणूक घडली ती दुर्दैवी आसा. हे दुर्घटणेंत निश्पाप लोकांक जीव वगडावचो पडलो. घर सांबाळपी भुरगो घरांतल्यान वचप हें कश्टदिणें. ताचे आवयक आनी ताच्या घरच्यांक दुख्ख पचोवपाची शक्त देवान दिवची, अशी प्रतिक्रिया उक्तायतना आमदार शेट खुबूच भावूक जाले.
राज्यपाल पिल्लई हांणी आयतारा मंत्री निळकंठ हळर्णकार हांचे सयत माडेल थिवीच्या आदित्य कवठणकार, तनुजा कवठणकार आनी यशवंत केरकार हांच्या घरा भेट दिवन तांच्या घरच्यांक भुजवण दिली. मजगतीं, राज्यपाल पिल्लई हांणी शेनवारा राती वेळार जीएमसींत वचून थंय उपचार घेवपी गंभीर जखमींची खबर घेतली. खेटाखेटींत जखमी जावन विवीध हॉस्पिटलांनी उपचार घेवपी सगळ्याच जखमींचेर योग्य तरेन उपचार करपाचे निर्देश आपणे मुख्यमंत्री डॉ. प्रमोद सावंत हांकां दिल्यात, अशें तांणी सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
