भांगरभूंय | प्रतिनिधी
73 जखमींतल्या 14 जाणांक गोमॅकाँत दाखल, 5 गंभीर
मरण आयिल्ल्यांच्या घरच्यांक दरेकी 10 लाखांची मजत
जखमींक एका लाखाची अर्थीक मजत जाहीर
जखमींचेर दिवचले, म्हापश्यां, गोमॅकाँत उपचार
भांगरभूंय । प्रतिनिधी
दिवचल/ पणजी : गोंया सयत देशभरांतल्या लाखांनी भाविकांचें श्रद्धास्थान आशिल्ले लयराई देवीचे जात्रेंत शेनवारां फांतोडेर जाल्ले खेटाखेटींत स भाविकांक मरण आयलें, जाल्यार 73 जाण जखमी जाले. जखमी जाल्ल्यां मदले पांच जाण गंभीर आसात. तांचेर गोमॅकाँत उपचार चालू आसात. मजगतीं, हे दुर्घटणेक जापसालदार धरून सरकारान उत्तर गोंय जिल्होधिकारी स्नेहा गीते, उत्तर गोंय पुलीस अधिक्षक अक्षत कौशल, दिवचलचे उपअधिक्षक जिवबा दळवी, निरिक्षक दिनेश गडेकार आनी दिवचल उपजिल्होधिकारी भीमनाथ खोर्जुवेंकार हांची बदली केली. ते उपरांत दुर्घटणेंत मरण आयिल्ल्यांच्या घरच्यांक दरेकी 10 लाख, जाल्यार जखमींक एका लाखाची अर्थीक मजत दितले, अशें मुख्यमंत्री डॉ. प्रमोद सावंत हांणी जाहीर केलें.
गोंयांतले सगल्यांत व्हड लयराईचे जात्रेंत अनियंत्रीत जाल्ल्या धोंडांक लागून शेनवारा फांतोडेर सुमार 3.30 वरांचेर जाल्ले खेटाखेटींत यशवंत केरकार (33. रा. माडेल थिवी), सागर नंदादुर्गी (31. रा. मठवाडो – पिळगांव) हांकां दिवचलच्या हॉस्पिटलांत, जाल्यार आदित्य कवठणकार (16. रा. अवचितवाडो – थिवी), तनुजा कवठणकार (51. रा. अवचितवाडो – थिवी, सूर्या नयेकार (62. रा. खलपवाडो- पाडोशें) आनी प्रतिभा कळंगूटकार (54. रा. खोर्ली) हांकां म्हापशेंच्या आझिलो हॉस्पिटलांत मरण आयलें. ते भायर हे खेटाखेटींत 74 जाण जखमी जाले. तातूंतल्या 14 जाणांक तत्काळ बांबोळेच्या गोमॅकाँत उपचारा खातीर दाखल केले. तातूंतल्या किरकोळ जखमी जाल्ल्या एकल्याक उपचारा उपरांत डिस्चार्ज दिलो. पूण तेरांतल्या पांच जाणांची भलायकी गंभीर आसा. तांकां व्हेंटिलेटराचेर दवरल्यात. तातूंतल्या दोगांची भलायकी सामकीच गंभीर आसा, अशें गोमॅकॉचे वैजकी अधिक्षक राजेश पाटील हांणी पत्रकारां कडेन उलयतना सांगलें.
दुर्घटणेंतले हेर जखमी दिवचल आनी आझिलो हॉस्पिटलांत उपचार घेतात. तातूंतल्या गंभीर आशिल्ल्यांक तत्काळ गोमॅकाँत धाडून दिवपाची सुचोवणी संबंदीत हॉस्पिटलांक केल्या, अशेंय पाटील हांणी सांगलें.
नेमके कितें जालें ?
लयराई जात्रेंतले खेटाखेटी वेळार प्रत्यक्ष हाजीर आशिल्ल्यांनी दिल्ले म्हायती प्रमाण, धोंड अनियंत्रीत जाल्ल्यान ही खेटाखेटी जाली. ताका लागून कांय जाण सकयल पडले. तातूंत खूब जाणांचो स्वास घुस्पटलो. तातूंतल्या स जाणांक मरण आयलें.
खेटाखेटी वेळार थंय आशिल्ल्या एका दुकानांत कांय लोक पडले. तांकां दुकानाक दिल्ले विजेचो शॉक लागलो.
घडणुकेचे सुवातेर पुलिसांनी बंदोबस्त दवरिल्लो, पूण जिवाच्या आकांतान धांवपी भाविकांक आडावपाक तांकां पुराय अपेस आयलें.
मुख्यमंत्री फांतोडेरूच दिवचल भलायकी केंद्रांत
शिरगांवचे घडणुकेची म्हायती मेळटाच मुख्यमंत्री डॉ. प्रमोद सावंत फांतोडेर 5.15 वरांच्या सुमाराक दिवचल भलायकी केंद्रांत दाखल जाले आनी तांणी थंय उपचारा खातीर दाखल केल्ल्या जखमींची खबर घेतली. तशेंच जखमीं वयल्या उपचारां खातीर गरजेची सगली मजत करपाचे निर्देश तांणी प्रशासनाक दिले. ते उपरांत तांणी म्हापशेंच्या आझिलो आनी बांबोळेच्या गोमॅकॉक भेट दिवन मरण आयिल्ल्यांच्या घरच्यांची भेट घेतली.
देवस्थान समितीचें स्पश्टीकरण
यशस्वीनी बी. उत्तर गोंयची जिल्होधिकारी
लयराई जात्रेंतले खेटाखेटीचे फाटभुंयेर, सरकारान तत्काळ उत्तर गोंय जिल्होधिकारी स्नेहा गीते हांची विज्ञान-तंत्रज्ञान आनी कोयर वेवस्थापन खात्याच्या संचालकपदार बदली केल्या आनी तांचे सुवातेर येशस्वीनी बी. हांची नेमणूक केली. तशेंच उत्तर गोंय पुलीस अधिक्षक अक्षत कौशल हांकां काडून गुन्यांव फांट्याचे अधिक्षक राहूल गुप्ता हांचे कडेन उत्तर गोंय पुलीस अधिक्षक पदाचो अतिरिक्त ताबो दिला. ज्या अधिकाऱ्यांचो सरकारान बदल्यो केल्यात, त्या सगल्यां कडल्यान हे दुर्घटणे संबंदांत अहवाल सादर जातलो, अशी म्हायती सुत्रांनी दिली.
संदीप जॅकीस हांचे अध्यक्षते खाला समिती स्थापन
लयराईचे जात्रेंतले खेटाखेटीचे चवकशे खातीर सरकारान महसूल सचीव संदीप जॅकीस हांचे अध्यक्षते खाला सरकारान समिती स्थापन केल्या. हे समितींत पुलीस उपम्हानिरिक्षक वर्षा वर्मा, येरादारी संचालक परिमल अभिषेक आनी दक्षीण गोंय पुलीस अधिक्षक टिकम सिंग हांचो आस्पाव केला. ही समिती प्रत्यक्ष घडणुकेचे सुवातेर वचून दुर्घटणेच्या कारणांचो सोद घेवन सरकाराक अहवाल सादर करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
