भांगरभूंय | प्रतिनिधी
पणजी : शिरगांवच्या खेटाखेट प्रकरणांत सरकारान स्थापन केल्ले चवकशी समितीन आजून अहवाल सादर करूंक ना. फुडल्या कांय दिसांनी तो येतलो. अहवालाक मात्सो उशीर जातलो अशें मुख्यमंत्री डॉ. प्रमोद सावंत हांणी सांगलें.
लयराई जात्रेच्या दिसा शेनवारा सकाळीं भाविकां मदीं जाल्ले खेटाखेटींत ६ जाणांक मरण आयिल्लें. ७० परस चड भावीक जखमी जाल्यात. कांय जाणांचेर उपचार सुरू आसात. खेटाखेटीचे चवकशे खातीर सरकारान महसूल सचीव संदीप जॅकीस हांच्या मार्गदर्शना खाला समिती स्थापन केल्या. समितीन काम सुरू केलां. तेन्नाची उत्तर गोंय जिल्लोधिकारी स्नेहा गित्ते, उत्तर गोंय पुलीस अधीक्षक अक्षत कौशल आनी हेर अधिकार्यांच्यो जबान्यो नोंद केल्यात. जखमींच्यो जबान्यो नोंद करपाचें काम सुरू आसा, अशी म्हायती चवकशी समितींतल्या एका वांगड्यान दिली. जबान्यो नोंद केले उपरांत घडणुके सुवाते वेळावेली स्थिती आनी हेर गरजेच्या गजालींचो अभ्यास करतले. हे खातीर उशीर जावपाचो आशिल्ल्यान अहवाल उसरां सादर जातलो. चवकशी समिती सोमारा अहवाल सादर करतली, अशें डॉ. सावंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
