भांगरभूंय | प्रतिनिधी
रस्ते, मुळाव्या सुविदांची कामां बेगीनूच सुरू जातलीं
पणजी : शिरगांव लयराय जात्रेच्या खेटाखेटी विशींचो तपास अहवाल सरकाराक सादर जाला. ह्या तपास अहवाला प्रमाण कारवाय जातली. गर्दीच्या वेवस्थापना खातीर मुळाव्यो सुविदा तयार करपाचोय आराखडो सादर जाला. आराखड्या प्रमाण कामां सुरू जातलीं, अशें मुख्यमंत्री डॉ. प्रमोद सावंत हांणी सांगलें.
मंत्रिमंडळ बसके उपरांत मुख्यमंत्र्यांनी विवीध विशयांची म्हायती दिली. पर्तगाळी मठाक ५५० वर्सां पुराय जातात. एका मठाक ५५० वर्सां पुराय जावप हो गोंयां खातीर अभिमानाचो खीण आसा. ह्या निमतान प्रधानमंत्री नरेंद्र मोदी हांचे हस्तुकीं फाल्यां ७७ फुट उचायेच्या पुतळ्याचें अनावरण जातलें. ही कार्यावळ सगल्यां खातीर उक्ती आसा. पणजे परशुरामाचो पुतळो आसा. आतां दक्षीण गोंयांत काणकोण हांगा श्रीरामाचो पुतळो जाला. हाका लागून राज्यांतल्या आध्यात्मीक पर्यटनाक उर्बा मेळटली, अशी आस्त मुख्यमंत्र्यांनी उक्तायली.
पुलीसांनी म्हायती दिल्या उपरांतूच पूजा नायक प्रकरणाचेर भाश्य
पूजा नायक हिणें केल्ल्या आरोपांच्या तपासाची म्हायती हांवें पुलिसां कडल्यान घेवंक ना. पुलिसां कडल्यान म्हायती घेतल्या उपरांत हांव ह्या विशयाचेर उलयतलों, अशें मुख्यमंत्री डॉ. प्रमोद सावंत हांणी सांगलें.
कामसूत्र सारख्या कार्यावळींक राज्यांत परवानगी ना
टेल्स ऑफ कामसूत्र सारक्या कार्यावळींक सरकार केन्नाच परवानगी दिवचो ना. सामजीक संघटणां कडल्यान निवेदन येवचे पयलींच कार्यावळीचेर बंदी घालपाचो आदेश सरकारान पुलीसांक दिल्लो. सरकारा कडल्यान परवानो घेवच्या पयलीं कार्यावळीची जायरात लेगीत करपाक मेळची ना. टेल्स ऑफ कामसूत्र कार्यावळ आयोजकांचेर कारवाय करपाचे आदेश पुलिसांक दिल्या, अशें मुख्यमंत्र्यांनी सांगलें.
वाग वाठार : अभ्यासा उपरांत सीईसी अहवालाचेर भाश्य
वाग वाठाराविशी सर्वोच्च न्यायालयाच्या तज्ज्ञ समितीन (सीईसी) जो अहवाल दिला तो सरकारा मेरेन पावोक ना. ह्या अहवालाचो अभ्यास केल्या उपरांत भाश्य करप शक्य जातलें, अशेंं मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
