शिरगांव खेटाखेटः जापसालदार कोण? मुख्यमंत्र्यान केलें स्पश्ट

भांगरभूंय | प्रतिनिधी

पणजीः शिरगांव लयराई जात्रेंत जाल्ले खेटाखेटींत स जाणांक मरण आयलें आनी 80 परस चड भक्त जखमी जाल्लें. जात्रेंत धोंड, भक्त आनी प्रशासना कडल्यान जागृताय आनी शिस्त गरजेची आसा. तशेंच फुडाराक अशी घडणूक परतून घडची न्हय हे खातीर सरकार सगली जतनाय घेतलो अशीय म्हायती मुख्यमंत्र्यान त्या वेळार दिल्ली.
हे दुर्घटनेची दखल घेवन सरकारान महसूल सचीव संदीप जॅकीस हांच्या फुडारपणा खाला पुराय तपास करपा खातीर समिती स्थापन केल्ली. हे समितीन थळाक भेट दिवन दुर्घटने वेळार थंय हाजीर आशिल्ल्या कडेन चर्चा करुन निमाणे पांच दिसांनी अहवाल तयार करून मुख्यमंत्री डॉ. प्रमोद सावंत हांचे कडेन तो सादर केलो.
हो अहवाल शंबर पानांचो आसून बिरेस्तारा रातीं उसरां मुखेल सचीव डॉ. वी. कांडावेलू हांचे कडेन अहवाल सादर केलो. ह्या अहवालाचेर फुडलो निर्णय सरकार घेतलें अशी म्हायती चवकशी समितीचे मुखेली जॅकीस हांणी दिल्ली.
मजगतीं, अहवाल सादर केले उपरांत डॉ. सावंत ताचेर उलयले. लयराई जात्रेंत जाल्ले खेटाखेटींत चवकशी समितीन उत्तर गोंयची आदली जिल्लोधिकारी स्नेहा गीते, आदले पुलीस अधीक्षक अक्षत कौशल, दिवचलचे आदले उपअधीक्षक जीवबा दळवी, आदले निरिक्षक दिनेश गडेकार, आदले उपजिल्लोधिकारी भीमनाथ खोर्जुवेकार हांचें सयत देवस्थान समिती आनी पंचायत समितीक दोशी थारायलां अशें मुख्यमंत्री डॉ. सावंत हांणी स्पश्ट केलें. अहवालांतल्या निरिक्षणाची चवकशी सरकार करीत आसा आनी दोशींचेर निश्चीत कारवाय जातली हाची हमी मुख्यमंत्र्यान दिली.
मजगतीं, हे दुर्घटनेक लागून लयराई देवस्थानाच्या सध्याच्या आनी आदल्या अध्यक्षां मदीं आरोप – प्रत्यारोप सुरू जाल्ले. आदले अध्यक्ष गणेश गांवकारान हे घडणुकेक सध्याचे अध्यक्ष दीनानाथ गांवकार जापसालदार आसात असो आरोप केल्लो जाल्यार दीनानाथ गांवकारान हातूंत गणेश गांवकार हांचो हात आसूं येता असो दावो केल्लो.