भांगरभूंय | प्रतिनिधी
दिवचल : गोंयांतल्या अध्यात्मीक आनी सनातन धर्म संस्कृतीचें दर्शन घडोवपी ‘अग्नीदिव्यां’त व्हड संख्येन वांटो घेवचो, असो उलो मयेंचे आमदार प्रेमेंद्र शेट हांणी मारलो. ‘गोंय अध्यात्मीक महोत्सवा’च्या तिसऱ्या दिसा जावपी ‘अग्नीदिव्य’ कार्यावळीच्या नांव तकट्याचें अनावरण केले उपरांत ते उलयताले. 8 मार्चाक शिरगांवच्या लयराईच्या प्राकारांत ‘गोंय अध्यात्मीक महोत्सवा’चें आयोजन केलां.
श्री दत्त पद्मनाभ पीठ सद्गुरू फावंडेशनान गोंय अध्यात्मीक महोत्सव आयोजीत केला. नांव तकट्याचें अनावरण करचे आदीं देवाच्या पांया कडेन नाल्ल दवरून आशिर्वाद घेतले. ह्या वेळार श्री दत्त पीठ संप्रदायाचे सृजन नायक, लयराई देवस्थानाचे अध्यक्ष गणेश गांवकार, भगवंत गांवकार, लक्षराज आमोणकार, आरती बांदोडकार हाजीर आशिल्ली. शेनवारा 8 मार्चाक सांजेच्या 4.30 वरांचेर ही कार्यावळ देवी लयराईच्या देवळांत जातली.
संवसारीक पांवड्याचेर गोंयची खतावल्ली प्रतिमा पुसून सनातन धर्माचो वावर गोंयांत कसो चल्ला हें संवसाराक दाखोवपा खातीर सद्गुरू ब्रह्मेशानंद स्वामीचो हो यत्न आसा. ते खातीर गोंयांतल्या सगळ्या जागरूक हिंदू समाजान तशेंच लयराई देवीच्या भाविकांनी कार्यावळीक हाजेरी लावची, असो उलो आमदार शेट हांणी मारलो. ही कार्यावळ सेगीत दुसऱ्या वर्सा मयें मतदारसंघात आयोजीत केल्ले खातीर तांणी खोस उक्तायली. देवस्थान अध्यक्ष गांवकार हांणी कार्यावळीचे तयारेची जापसालदारकी स्विकारल्या. देवीच्या जात्रेंतल्या सगळ्या धोंडांक ह्या महोत्सवाचें तांणी जाहीर निमंत्रण दिलें. अध्यात्मीक महोत्सवाचे मुखेली सृजन नायक हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
