भांगरभूंय | प्रतिनिधी
दिवचल: शिरगावच्या श्री लइराई देवीच्या सोबितीकरण केल्ल्या नामनेच्या धोंडांच्या तळ्याचें लोकार्पण आनी रस्त्याच्या डांबरीकरण कामाचो मयें मतदारसंघाचे आमदार प्रेमेंद्र शेट हांचे हस्तुकीं शुभारंभ हालींच जालो.
शिरगांवच्या श्री लइराई देवीच्या नामनेच्या धोंडाचे तळयेच्या सोबितीकरण कामाचें लोकार्पण जालें. तशेंच देवीचें श्री लइराईचें मंदीर ते अस्नोडें बस स्टॅण्ड मेरेन डांबरीकरण केलें.
ह्या वेळार उक्तावण सुवाळ्याक जिल्हो पंचायत वांगडी शंकर चोडणकार, सरपंच करिश्मा गांवकार, उप सरपंच जयंत गांवकार, पंच वेदिका शिरगांवकार, देवराज गांवकार, सुर्यकांत पाळणी, देवस्थानाचे अध्यक्ष गणेश गांवकार, जलसंपदा विभाग अभियंते के. पी. नायक, सहाय्यक अभियंते पोकळे, कनिश्ठ अभियंते श्री विवेक परब आनी शिरगांव ग्रामस्थ हाजीर आशिल्ले.
शिरगांवां जमनी पोंदच्या लायटीच्या सरयांक लागून सगळे रस्ते फोडिल्ले. धुल्लाचो त्रास लोकांक जालो. पूण जात्रे पयलीं सगळे रस्ते डांबरीकरण करून सुळसुळीत करपाचो संकल्प पुराय जाता हाचें समाधान आशिल्ल्यान उदरगतीचे प्रक्रियेंत सहकार्य करचें असो उलो आमदार प्रेमेंद्र शेट हांणी मारलो.
धोंडांच्या पवीत्र तळ्याक आतां नवें रूप दिल्ल्यान हाचो बरे तरेन उपेग जातलो. हजारांनी उपास धरपी धोंडांची बरे तरेन वेवस्था जातली अशें आमदारान फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
