शिरगांवचे देवी लयराईचे जात्रे खातीर विशेश ‘कृती दळ’ स्थापन

भांगरभूंय | प्रतिनिधी

पणजीः शिरगांवचे लाखांनी भक्तांचें श्रद्धास्थान आशिल्ले देवी लयराईची वर्सुकी जात्रा 21 एप्रिलाक जातली. जात्रेक जावपी व्हड गर्दी आनी सुरक्षेची गरज मतींत दवरून दिवचलच्या उपजिल्होधिकारी आनी उपविभागीय दंडाधिकारी शुभम नायक हांणी म्हत्वाचो आदेश जारी केला. जात्रेच्या वेळार भौशीक सुवातेर सुरक्षेचे नेम खरपणान चालीक लावपा खातीर आनी कसलीच अप्रिय घडणूक घडची न्हय हे खातीर खाशेलो ‘संयुक्त कृती दळ’ स्थापन केला.
भारतीय नागरिक सुरक्षा संहिता, 2023 च्या कलम 152 खाला हो आदेश जारी केला. ह्या कृती दळाचे मुखेली दिवचलचे मामलेदार आसतले. जाल्यार तांच्या मार्गदर्शना खाला पुलीस निरिक्षक, उजो पालोवपी अधिकारी, वीज खात्याचे कार्यकारी अभियंते, भौशीक बांदकाम खात्याच्या रस्तो आनी इमारत खात्याचो कार्यकारी अभियंतो आनी शिरगांव पंचायतीचे सचीव हांचो ह्या दळांत आस्पाव केला. जात्रेच्या नियोजना वेळार गर्दी नियंत्रणांत दवरप, अनधिकृत बांदकाम काडून उडोवप आनी आपत्कालीन मार्ग उक्ते दवरप ही ह्या दळाची मुखेल जापसालदारकी आसतली.
गोंयच्या मुंबय उच्च न्यायालयान याचिकेचेर सुनावणी करतना हाचे पयलीं जात्रे वेळार गर्दीचें नियोजन आनी प्रतिबंधात्मक उपायांचेर भर दिल्लो. हे फाटभुंयेर प्रशासनान अंदूं चड जतनाय घेतल्या. नव्या नेमा प्रमाण, सक्षम प्राधिकरणाचे लेखी परवानगे बगर रस्ते, फुटपाथ वा खंयच्याय भौशीक सुवातेर स्टॉल, शेड वा तात्पुरती बांदावळ उबारपाक खर बंदी आसा. तशेंच आपत्कालीन वाहनांच्या मार्गांत आडखळ येतली अशें पद्दतीन उबी केल्ल्या वाहनाचेर कारवाय करपाचे निर्देश दिल्यात.
भौशीक सुवातेर आशिल्ली वीज उपकरणां, उजो पालोवपी यंत्रणा आनी संरचनात्मक वेवस्था सुरक्षेच्या मानकां प्रमाण आसप सक्तीचें आसा. ह्यो यंत्रणा असुरक्षित दिसल्यार त्यो काडून उडोवपाचे पुराय अधिकार कृती दळाक दिल्यात. येरादारी नियंत्रीत करपा खातीर पुलीस आनी येरादारी खात्यान थारायिल्ल्या सुवातींनीच पार्किंग करप सक्तीचें आसतलें. भौशीक बांदकाम खातें कृती दळाक गरजेची यंत्रणा, कामगार आनी तंत्रीक सहकार्य दितलो. ह्या आदेशाचे उल्लंघन करपी लोकांचेर कायदेशीर कारवाय करतले अशीय शिटकावणी प्रशासनान दिल्या. जात्रा पुराय जायसर वा फुडले आदेश येय मेरेन हो आदेश लागू उरतलो.