भांगरभूंय | प्रतिनिधी
आदले अध्यक्ष गणेश गांवकार हांचो आरोप
राज्य उत्सवाच्या दर्ज्याक विरोध केल्ले खातिरूय केली टिका
पणजी: लयराई जात्रेक जाल्ले खेटाखेटीत पुरायपणान सद्याची देवस्थान समिती आनी समितीचे अध्यक्ष दीनानाथ गांवकार हेच जापसालदार आशिल्ल्याचो आरोप आदले अध्यक्ष गणेश गांवकार हांणी केलो. प्रुडंट खबरा चॅनला वेले ‘हेडऑन’ कार्यावळींत ते उलयताले.
लयराईची जात्रा ही गोंयची सगल्यांत मोटी जात्रा आसता. लाखांनी संख्येन भावीक हे जात्रे खातीर येतात. ताका लागून सरकारान ह्या उत्सवाक राज्य उत्सवाचो दर्जो दिवपाचें थारायिल्लें. तशें जाल्लें जाल्यार भाविकां खातीर गरजेच्यो त्यो सगल्यो साधनसुविधा सरकार थंय स्वताच्या खर्चान उबारून दिवपाचें. पूण देवस्थान समितीन हेतुपुरस्सर सरकाराच्या ह्या निर्णयाक विरोध केलो. अशें आसून लेगीत अंदूंच्या जात्रोत्सवांतूय मामलेदार, पुलिसां कडल्यान सगले सहकार्य मेळिल्लें. पूण देवस्थान समितीन मात तांकां कसलेंच सहकार्य केलें ना अशें गांवकार हांणी म्हणलें.
अंदूंच्या जात्रोत्सवांत जशी घडणूक घडली तशीच एक घडणूक णव वर्सां पयलीं घडिल्ली. तातूंत देवस्थान समितीच्या एका वांगड्याच्या घरकान्नीचो हात मोडिल्लो. ताका लागून आपणें भाविकांची गर्दी चड आशिल्ल्यो सुवातो निश्चीत करून थंय बॅरिकेड्स लावपा सयत पुलिसांचो बंदोबस्त दवरपाक प्राधान्य दितालों. पूण पोरूं वर्सां लेगीत सद्याचे अध्यक्ष आशिल्ले दीनानाथ गांवकार हांणी बॅरिकेड्स लावपाक विरोध केल्लो. अंदूंय तांणी तेंच केलें. म्हाका कसलेच गजालींत हस्तक्षेप करूंक दिलो ना. ताका लागून जात्रोत्सवांत खेटाखेटीची दुर्दैवी घडणूक घडली. हातूंत स जाणांक मरण आयलें. खूबशे जाण जखमी जाले. हाका पुरायपणान सद्याची समिती आनी दीनानाथ गांवकार हेच जापसालदार आशिल्ल्याचो दावोय तांणी केलो.
लयराई हें फक्त 410 म्हाजनांचें देवस्थान न्हय
लयराई देवस्थान हें फक्त शिरगांवांतल्या 410 म्हाजनांचें देवस्थान न्हय. हें देवस्थान पुराय गोंयचें आसा. ताका लागूनच लाखांनी भावीक हांगा दर्शना खातीर येतात अशें गणेश गांवकार हांणी म्हणलें. ह्या उत्सवाक राज्य उत्सवाचो दर्जो मेळिल्लो जाल्यार सरकार थंय दर्जेदार साधनसुविधा उबारपाचें अशें सांगून तांणी पोरणें गोंया जाल्ल्या कूड दर्शन सुवाळ्याचो संदर्भ दिलो.
मुख्यमंत्र्यांनी प्रधानमंत्र्यांक प्रतीक दिलें तेन्ना ओगी कित्याक बसले?
राज्य उत्सव जाहीर करीत आसतना मुख्यमंत्री डॉ. प्रमोद सावंत हांणी देवस्थानाच्या कारभारांत सरकार हस्तक्षेप करचें ना अशें स्पश्टपणान सांगिल्लें. तरी लेगीत सद्याचे समितीन राज्य उत्सवाचो दर्जो दिवपाक विरोध केलो. मुख्यमंत्री डॉ. प्रमोद सावंत हांणी लयराईचेंच प्रतीक प्रधानमंत्री नरेंद्र मोदी हांकां भेट म्हूण दिलें. त्या वेळार मात विरोधी करपी ओगी कित्याक बशिल्ले असो प्रस्नूय गणेश गांवकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
