भांगरभूंय | प्रतिनिधी
कर्नाटक वेंचणुकेचे फाटभुंयेर तपासणी नाक्यार गाडयांची खर तपासणी
भांगरभूंय । प्रतिनिधी
वाळपयः कर्नाटक राज्यांत विधानसभा वेंचणूक जावपाची आसा. ताका लागून गोंयांतल्यान व्हड प्रमाणांत सोऱ्याची निर्गत कर्नाटक वाठारांत जावपाची शक्यताय आसा. ताका लागून उत्तर गोंय जिल्होधिकाऱ्यान कर्नाटक शिमे वयलीं सोऱ्याचीं दुकानां 6 मे सावन बंद दवरपाचीं तशेंच ते संबंदांतले तकटे बार्रा भायर लावपाचो आदेश दिल्यात. सत्तरी म्हालांतल्या एकाय बार्राक ताचो मार बसचो ना, अशें अबकारी खात्याच्या अधिकाऱ्यांनी स्पश्ट केलां.
उत्तर गोंय जिल्होधिकाऱ्यान दिल्ल्या निर्देशा प्रमाण कर्नाटक शिमे सावन 4 किलोमिटर अंतराचेर आशिल्लीं सोऱ्याचीं दुकानां बंद करपाचो आदेश आसा. केरी पंचायतींतल्या सुर्ला आनी ठाणे पंचायत वाठारांतल्या सुर्ला गांवाक मात हाचो परिणाम जावपाची शक्यताय आसा. मात कर्नाटक शिमे वयल्यान केरी वाठार सुमार 14 किलमिटर अंतराचेर आसा. जाल्यार ठाणे पंचायतींतल्या सुर्ला गांवांतलीं सोऱ्याचीं दुकानां सुमार पांच वर्सां सावन बंद आसात. ताका लागून उत्तर गोंय जिल्होधिकाऱ्याच्या आदेशाचो चडसो परिणाम कर्नाटक शिमे लागसार आशिल्ल्या सोऱ्याच्या दुकानांक बसचो ना, अशें अधिकाऱ्यांनी स्पश्ट केलें.
हे संबंदांत अदीक म्हायती दितना अबकारी अधिकाऱ्यान सांगलें, सध्या तरी गोंय- कर्नाटक मदल्या केरी तपासणी नाक्याचेर बारीकसाणीन गाडयांची तपासणी करपाची प्रक्रिया हातांत घेतल्या. दरेके गाडयेची बारीकसाणीन तपासणी करपाचो यत्न खात्याचे कर्मचारी करतात. 24 वरां कर्मचाऱ्यांचो पंगड केरीच्या तपासणी नाक्याचेर तैनात केला. तेचवरी केरी ते कर्नाटक शिमे मेरेन नेमान तेळणी चल्ल्या. खंयचेच स्थितींत गोंयांतल्यान कर्नाटकांत सोऱ्याची बेकायदो येरादारी जावची न्हय हाची विशेश जतनाय घेतात, अशें अधिकाऱ्यांनी स्पश्ट केलां. ज्या गाडयांची तपासणी करतात ताची पुराय नोंद अबकारी खात्याच्या कागदपत्रांत नोंद करतात, अशेंय तांणी सांगलें. उत्तर गोंयांतलो सत्तरी म्हाल हो कर्नाटकाक सामको लागींचो. म्हत्वाचें म्हणल्यार केरी पंचायत वाठारांतलो केरी गांव तशेंच ठाणे पंचायतींतलो सुर्ला गांव हो कर्नाटकांतल्या बेळगांव वाठारांत वचपी संपर्क रस्तो आसा. हे खातीर ह्याच मार्गांतल्यान सोऱ्याचो सांठो कर्नाटकांत वचपाची शक्यताय आसा. हेच खातीर ह्या मार्गाचेर बारीक नदर दवरल्या. तेचवरी सत्तरी म्हालांतल्या नगरगांव आनी सांवड्डें वाठारांतल्यान कर्नाटकांत रस्तो वता. ह्या रस्त्या वयल्यान येरादारी जायना, तरी लेगीत आडमार्गान सोरो कर्नाटकांत वचपाची शक्यताय आसा. ताका लागून ह्या मार्गाचेर विशेश नदर दवरतले, अशें अधिकाऱ्यांनी सांगलें. अबकारी खातेंहे बाबतींत खंयच्याच पांवड्यार उणे पडचें ना, हाची विशेश दखल घेतल्या, अशेंय तांणी स्पश्ट केलें.
सुर्लाचीं सोऱ्याचीं दुकानां सात वर्सां सावन बंद
ठाणे पंचायत वाठारांतल्या सुर्ला गांवांत सुमार 16 सोऱ्याचीं दुकानां आशिल्लीं. मात थळाव्यांनी तांचे आड आंदोलन केल्ल्यान सरकारान त्या दुकानांचे परवाने निलंबीत केले. ताका लागून ह्या वाठारांतल्यान कर्नाटकांत सोरो वचपाचो प्रस्नूच येना. अबकारी खात्याक ही एक व्हड थाकाय, अशें अधिकाऱ्यांनी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
