भांगरभूंय | प्रतिनिधी
अखील गोंय लॉरी संघटणेची येरादारी खात्याकडेन मागणी
पणजीः जीएसटी लागू जाल्ल्यान शिमेर आशिल्ले सगळे चॅकपोस्ट आतां कांय कामाचे नात, असो आदेश केंद्रीय येरादारी मंत्रालयान जारी केला. देखून राज्य सरकारान गोंयचे शिमेर आशिल्ले सगले चेकपोस्ट १५ दिसां भितर काडून उडोवचे. हे विशीं मुख्यमंत्री डॉ. प्रमोद सावंत हांणी हस्तक्षेप करचो, अशी मागणी अखील गोंय लॉरी धनी संघटनेचे अध्यक्ष श्रीकांत च्यारी हांणी केल्या.
च्यारी हांच्या फुडारपणा खाला संघटेणेच्या वांगड्यांनी सोमार येरादारी संचालकची भेट घेवन हे विशीं तांकां निवेदन भेटयलें.
निवेदन भेटयले उपरांत उलयतना च्यारी हांणी सांगलें, वर्स २०१७त जीएसटी लागू जाले उपरांत केंद्रीय रस्ते आनी म्हामार्ग, येरादारी मंत्रालयान संप्टेबर २०२१सात एक आदेश जारी करून राज्याचे सिमेर येरादारी चॅक पोस्टाची गरज नाशिल्ल्याचें नमुद केलां.
वाहनां आनी चालकां विशींचो सगलो डेटा वाहन आनी सारथी प्लॅटफोर्माचेर एकठांय करून दवरला. देखून चेकपोस्टाचेर नियमीत तपासणेची गरज ना अशें स्पश्ट आदेशांत म्हटलां. देखून राज्यांचे सगळे शिमेचेर आशिल्ले चेकपोस्ट १५ दिसा भितर काडून उडोवचे, अशी मागणी च्यारी हांणी केल्या.
रस्तो येरादारी मंत्रालयान हे विशींचे निर्देश गोंयां सयत १२ राज्यांक ६ संप्टेबराक २०२१त येरादारी खात्यांच्या सचिवांक पावल्यात. हे निर्देशांत स्पश्ट म्हणलां, जुलय २०१७त जीएसटी लागू जावन सगळो डेटा वाहन आनी सारथी पोर्टलाचेर उपलब्ध आशिल्ल्यान चॅक पोस्टांची गरज ना, अशें च्यारी हांणी दाखोवन दिलें.
ह्या निर्णया प्रमाण खुपश्या राज्यांनी येरादारी चेकपोस्ट काडून उडयल्यात. देखून राज्यांतल्या सद्याच्या चेकपोस्टांची स्थिती कितें आसा ती मंत्रालयाक बेगीन कळोवची अशेय निर्देश मंत्रालयान गोंय राज्याक दिल्ल्याचे, च्यारी हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
