भांगरभूंय | प्रतिनिधी
मुख्यमंत्रीः दोडामार्गार पुलीस आवट पोस्टाचें लोकार्पण
भांगरभूंय । प्रतिनिधी
दिवचलः गोंयच्या सगळ्या शिमे वयल्या तपासणी नाक्यांचेर इंटिग्रेटेड बॉर्डर मॅनेजमेंट सिस्टम सुरू करतले. ताका लागून गोंयांत येवपी- वचपी गाडयांचेर देखरेख दवरप तशेंच सोरो आनी हेर बाबतींत तपासणी, जीएसटी कर प्रणाली ह्या सारकिल्ल्या गजालींनी योग्य तरेन तपास करून चालना दिवपाक मजत मेळटली. बेगिनूच सगळे सोपस्कार पुराय करून हें वेवस्थापन चालीक लायतले, अशी घोशणा मुख्यमंत्री डॉ. प्रमोद सावंत हांणी केली.
गोंय दोडामार्गा वयले शिमेर नुतनीकरण केल्ल्या पुलीस आवट पोस्टाचें लोकार्पण केले उपरांत मुख्यमंत्री उलयताले.
पत्रादेवी, पोळें, केरी, मोलें, दोडामार्ग ह्या शिमेंचेर इंटिग्रेटेड बॉर्डर सिस्टम वेवस्था दितले. ताका लागून महसूल चोरी, तशेंच वेगवेगळ्या म्हालाची चोरी, जीएसटी संबंदांतलो कर, विवीध तरेच्या चोरयांचेर लक्ष दिवप हे वेवस्थेक लागून शक्य जातलें. गोंयांत येवपी तशेंच गोंयांतल्यान वचपी गाडयां संबंदांत ही आधुनीक सिस्टम फायद्याची थारतली, अशें मुख्यमंत्र्यान सांगलें. गोंयांतल्यो पुलीस इमारती दर्जेदार करपाचेर लेगीत सरकाराचो भर आसतलो, अशेंय तांणी स्पश्ट केलें.
सरकाराची जमीन हडप करपाचे प्रकार वाडल्यात. कसल्याय प्रकल्पाक शार तशेंच गांवगिऱ्या वाठारांत विरोध करपाची प्रवृत्ती वाडल्या. ही उदरगतीक आडमेळीं हाडपी घातक प्रवृत्ती आसा. सरकारी जमनीर कोणेय अतिक्रमण करून जमीन हडप करपाचो प्रकार केलो जाल्यार खर कारवाय करतले, तशेंच बांदिल्लीं बेकायदेशीर घरां मोडटले, अशी भुमिका मुख्यमंत्री डॉ. सावंत हांणी ह्या वेळार जाहीर केली.
आमदार डॉ. चंद्रकांत शेट्ये हांणी सांगलें, हे सुवातेर आशिल्लें आदलें आवट पोस्ट सामकें मोडपाक पाविल्लें. मुख्यमंत्री डॉ. सावंत हांणी फुडाकार घेतिल्ल्या ह्या आवट पोस्टाक नवें रूप मेळ्ळां. गोंयांत येवपी पर्यटकां खातीर हें एक आकर्शण थारतलें, अशे तरेची ही वास्तू आसा.
मुख्यमंत्री सेगीत उदरगतीक आदार करतात. हे मुखारूय हे गजालीचेर मुख्यमंत्र्यान ठाम रावचें, अशी आमची विनवणी आसा, अशें आमदार डॉ. शेट्ये हांणी मागलें.
फीत कापून नांवकटल्याचें अनावरण करून तशेंच दिवली पेटोवन ह्या वास्तूचें लोकार्पण जालें.
सुमार 50 लाख रुपया खर्च करून भौशीक बांदकाम खात्या वतीन वास्तू बांदल्या. थंय सगळे तरेच्यो सुविधा दिल्यात. लोकार्पण सुवाळ्याक पुलीस खात्याचे वरिश्ठ अधिकारी आलोक कुमार, राहूल गुप्ता तशेंच उत्तम पार्सेकार, कोलवाळकार, प्रदीप रेवडकार, सरपंच रामा गांवकार आनी हेर मानेस्त हाजीर आशिल्ले.
‘उठसूठ विरोध करपाची प्रवृत्ती उदरगतीक आडमेळ’
सरकारी जमनीर खूबशे नवे प्रकल्प उबे जातात. पर्यावरण आनी हेर गजालींचो योग्य समन्वय सादून हे प्रकल्प हातांत घेतले. कांय लोक गरजे भायर दिशाभूल करून राजकारण करतात. ताका लागून उठसूठ विरोध करपाची प्रवत्ती उदरगतीक आडमेळीक हाडपी आसा, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
