भांगरभूंय | प्रतिनिधी
माशेलः तरणाट्यांनी नुस्तें वेवसायांतल्या विवीध सरकारी येवजण्यांचो लाव घेवचो. शिनाण्याची पद्दतशीर शेती तरणाट्यांची बेरोजगारी पयस करपाक मजत करपाक शकता, असो विस्वास कुमारजुंवेचे आमदार राजेश फळदेसाय हांणी उक्तायलो.
आखाडो सांत इस्तेव्ह वाठारांत नुस्तें वेवसाय संचालनालया वतीन आयोजीत शिनाण्याचे शेती विशीं जनजागृती कार्यावळींत आमदार फळदेसाय उलयताले. ह्या वेळार नुस्तेमार मंत्री नीळकंठ हळर्णकार, सांत इस्तेव्हची सरपंच स्मीता सावंत, उपसरपंच इस्तेव्ह रिबेरो, थळावी पंच सायरा नार्वेंकार, नुस्तेमार खात्याची संचालक शर्मिला मोंतेरो आनी हेर अधिकारी हाजीर आशिल्ले.
शिनाण्याचे शेतीक बरो प्रतिसाद मेळटा. गांवांतली आमची ही पयलीच कार्यावळ. ही पद्दत आपणावन शेतकार व्हड प्रमाणांत फायदो मेळोवपाक शकतात. सरकारा वतीन साबार येवजण्यो आनी अनुदान दितात. ताका लागून तरणाट्यां मदली बेरोजगारी व्हड प्रमाणांत पयस जावपाक शकता. नुस्तेमारीक चालना दिवचे खातीर आखाडो वाठार आदर्श आसा. अंदूंच्या अर्थसंकल्पांत नुस्तेमारी उद्देगाचेर भर दिला. लोक ह्या येवजण्यांचो लाव घेवपाक शकतात. इत्सूक तरणाट्यांनी आपल्या कार्यालयांत येवन विवीध येवजण्यांची म्हायती घेवची. आपूण कसलीय मजत करपाक तयार आसा, अशें आमदार फळदेसाय हांणी सांगलें. गोंयांत ‘एक्वा फार्मींगा’क चालना दिवपाचो गोंय सरकाराचो यत्न आसा. आमकां ह्या मळार उद्देजक घडोवपाची गरज आसा. आमच्या खात्या वतीन विवीध प्रशिक्षण कार्यावळी आयोजीत करतात. शिनाण्याचे शेतीचे व्हड वेवसायीक फायदे आसात आनी तातूंत व्हड येसूय मेळटा. तशेंच अनुदान येवजण्यो व्हड प्रमाणांत आशिल्ल्यान लुकसाण जावपाचो धोको उणो आसा, अशें मंत्री हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
