भांगरभूंय | प्रतिनिधी
चिमणी हें ल्हानशे नाजूक सुकणें. तुमच्या आमच्या परिचयाचें. सकाळीं सुर्य उदेंलो काय सगल्यांत पयलीं जाग येता ती पिटकुले चिमणेक. सकाळींच तांचो चिंवचिंवाट कानार पडटा. शारां परस गांवगिऱ्या वाठारान घराच्या सरभोंवतणी, आंगणांत, व्हरांड्यांत, पोरसांत, झाडांचे खांदयेर तांची चिंवचिंव चालूच आसता. ती आयकून मन प्रसन्न जाता.
चिणी ही पर्यावरणाचो एक म्हत्वाचो घटक. ताची राखण करप आमची जापसालदारकी. तशें पळोवंक गेल्यार राखाडी रंगाची चिमणी, तिची नाजूक काळी चोंच, पोटाचो धवोफुल्ल भाग आनी फाट तपकिरी रंगाची. तिची चाल विजे सारकी. गांवांतल्या आंगणांत सुकोवपाक घाल्लें भात, कड्डण, दाणें चोंचींत टिपून घेवपाक तांचो थवो सकयल देंवता. जमनीचेर पडिल्ले दाणें चिमणी हे वटेन ते वटेन पळोवन खाता, मदींच उडकी मारू न दुसरे कडेन बसता. आपल्या पिलांक चोंचीन दाणे भरयतात. एकेकदां त्यो एकमेकां वांगडा झगडटात. तांचो चिंवचिंव आवाज बदलता. केन्ना तीं गोल घिरट्यो मारतात. केन्नाय तकली वयर सकयल करून मान घुंवडायतात. तांचो चपळपणा, शिटूकपणा नदरेक पडटा. चिमणी ही नाजूक आशिल्ल्यान ल्हान व्हड झाडांच्या खांदयांचेर काडयो, बडयो, पानां पुंजावन घोंटेर बांदता. पानांनी ताका धांपता. पिलांक जल्म दिता. सकाळ जाली काय तांकां घोंटेरांत दवरून तांचे खातीर दाणे हाडटा. पिलांक भरयता.
आतां सगले कडेन रानां, वनां नश्ट करून थंय फार्म हावसां, बंगले, आस्थापनां बांदिल्ल्यान चिमण्यांची घरटीं ना जाल्यांत. तांकां जागो मेळटा थंय घोंटेर बांदचो पडटा. चिमणी चिमणी वारो घालो, कांवळ्या कांवळ्या उदक घाल, हीं बालगितां आतां इतिहासजमा जाल्यांत. आतले सारके चिमण्यांचे थवे पळोवपाचे दीस केन्ना येत तें सांगपाक येना. केन्नाय पांच, स चिमण्यांचो चिवचिवाट कानार पडटा. नाजाल्यार हालींची आजी पसून नातरांक पुस्तकांची चिमणी दाखोवन भरयता.. ही पळय चिमणी, हो माम चिंवूचो अशें म्हणपाची पाळी सगल्यांचेर येवची न्हय, इतलीच इत्सा.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
