भांगरभूंय | प्रतिनिधी
दोन वर्सा पयलीं काडिल्ली नोटीस पडल्या थंड पणजीः पणजी शारांतल्यो इमारती जो आपल्या एसीतलें उदक फुटपाथार सोडटाले तांचेर कारवाय करपाची शिटकावणी पणजी म्हापालिकेन दिल्ली. पूण ही शिटकावणी दिवन दोन वर्सा जाली. म्हापालिकेक हाचो विसर पडला आनी एसींतल्यान उदक फुटपाथार अजून मेरेन पडत आसा. गोवा कॅन एनजीओन हे विशीं आवाज काडून छत्री आंदोलन करपाची शिटकावणी दिल्या.
पणजे शारात फुटपाथाक तेंकून खुबश्यो इमारतीतल्या एसीची पायपां रस्त्यार सोडल्यात. देखून वयल्यान सकयल्यान सगळ्या वटेतल्यान हे एसीच्या पायपांतल्यान उदक पडून पादचाऱ्यांक त्रास जातालो. हे विशींची कागाळ गोवा कॅन हे एनजीओन पणजे म्हापिलिकेंत नोंद केली. हे कागाळीची दखल घेवन म्हापालिकेन भौशीक नोटीस काडिल्ली.
6 एप्रील 2023 त काडील्ले नोटीशेंत म्हणिल्लें, पणजे म्हापालिका वाठारांतल्या एसीचें उदक थेट फुटपाथांचेर सोडटात हे पालिकेच्या नदरेक हाडून दिल्या. देखून फुटपाथा वेल्यान यो-वच करपी लोकांक त्रास सोसचे पडटा. देखून संबंदींत आस्थापनांक निर्देश दितात, तांणी हो प्रकार बंद करचो. ना जाल्यार 15 एप्रील 2023 सावन ह्या उल्लंघनाचेर फावो ती कारवाय जातली, अशी शिटकावणी दिल्ली.
आतां 15 एप्रील 2023 त कांय दिसांनी दोन वर्सा पुराय जातात. पणजे म्हापालिकेन ही नोटीस गंभीर घेवंक नाशिल्ल्यान अजूनय चडश्यां इमारतींतल्यान एसीचें उदक फुटपाथाचेर पडटा. गोवा कॅन एनजीओन हे गजालीचो निशेध केला.
हे मोहिमेंत म्हापालिकेन आपल्या नगरसेवकांक आस्पावन घेवंक नाशिल्ल्यान ही कारवाय जायना. पणजी नितळ आनी लोकांक सोयिस्कर थारपी अशी प्रतिमा दवरतले जाल्यार नगरसेवकांक आस्पावन घेवप गरजेचें, अशे गोवा कॅनाचे रोलन्ड मार्टीन्स हांणी सांगलें.
ही नोटीस चालीक लावपा खातीर म्हापालिकेन एक व्हॉटसेप नंबर जारी करचो. जाका लागून असो प्रकार दिश्टी पडल्यार लोक पालिका अधिकारी वा मुखेलींक तो धाडपाक मजत जातली. म्हापालिकेन आतां तरी हाचेर कारवाय करची ना जाल्यार गोवा कॅन छत्री आंदोलन करतले, अशी शिटकावणी मार्टीन्स हांणी दिली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
