भांगरभूंय | प्रतिनिधी
रोहन खंवटेः दिवचले शिगमो उत्सवाचें उक्तावण
भांगरभूंय । प्रतिनिधी
दिवचलः गोंयांतलो शिगमो विविधताय आनी साबार वैशिश्ट्यांनी नटलां. नवे पिळगे खातीर आमची गिरेस्त संस्कृतीचें दायज फुडें व्हरचे खातीर हे उत्सव खूब म्हत्वाचे आसात. हें दायज तिगोवपा खातीर राज्य सरकार दर वर्सां गोंयभर हो उत्सव मनयता, अशें पर्यटन मंत्री रोहन खंवटे हांणी सांगलें.
दिवचल शिगमो उत्सव समिती आनी पर्यटन खात्या वतीन आयोजीत दिवचल शिगमो उत्सव मिरवणुकेच्या उक्तावण सुवाळ्यांत मंत्री खंवटे मुखेल सोयरे म्हूण उलयताले.
ह्या वेळार माचयेर आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष कुंदन फळारी, सचीन देसाय, अनिकेत चणेंकार, रामा परब, शंकर बेतकीकार, दिलीप धारगळकार हाजीर आशिल्ले.
पर्यटकांक शिगमो उत्सवाचें आकर्शण आसा. संवसारीक पांवड्याचेर हो उत्सव फामाद जाला. समाजीक एकचार, राष्ट्रीय एकचार सांबाळपाचें हो उत्सव म्हणल्यार व्हड साधन आसा. ह्या उत्सवा वरवीं भुरग्यांक, कलाकारांक माची मेळटा, अशें मंत्री खंवटे हांणी सांगलें.
आमदार डॉ. शेट्ये हांणी सांगलें, दिवचल सांस्कृतीक भूंय. परंपरीक उत्सव आदले पिळगे कडल्यान नवे पिळगे कडेन वतात. आमदार ह्या नात्यान वर्सभरांत खूबश्यो येवजण्यो चालीक लायल्यात. फुडारांत लेगीत साबार येवजण्यो आंखतलों, अशें तांणी सांगलें. दिवचले सांस्कृतीक भवन उबारपाचो निश्चेव केला, अशेंय तांणी सांगलें.
आमदार शेट हांणी सांगलें, शिगमो उत्सवांतल्यान एकचार आनी संस्कृतीची राखण जाता. परंपरा आनी सांस्कृतीक दायज तिगोवपा खातीर हे उत्सव म्हत्वाचे आसात. दिलीप धारगळकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
