भांगरभूंय | प्रतिनिधी
-एडीआय कडल्यान शिक्षण संचालनालयाक अहवाल सादर
पणजी : विठ्ठलापूर – सांखळेतल्या प्राथमीक शाळेंतल्या विद्यार्थ्याक जाल्ल्या कथीत मारपेट प्रकरणांत संबंदींत शिक्षिका निर्दोश आसा, अशी म्हायती भाग शिक्षण अधिकाऱ्यांनी शिक्षण संचालनालयाक दिल्या. शिक्षण संचालक शैलेश झिंगडे हांणी ही म्हायती दिली. विद्यार्थ्याच्या पालकांनी हे विशीं दिवचल पुलिशेंत कागाळ केल्ल्यान गुन्यांव नोंद जाला. सत्य स्थिती पुलीस तपासात उक्तीं जातली, अशें तांणी सांगलें.
शिक्षण खात्या कडेन विद्यार्थ्याच्या पालकांनी कागाळ करुंक ना. तरी लेगीत दिसाळ्यांनी बातम्यो आयिल्ल्यान शिक्षण संचालनालयान भाग शिक्षण अधिकाऱ्याक चवकशी करून अहवाल दिवपाक सांगलां. संबंदींत शिक्षिकेन विद्यार्थ्याक मारपेट करुंक ना. तो विद्यार्थी वणटीक आपटून जखमी जालो, अशी म्हायती हेर शिक्षकांनी दिली.
पालक शिक्षक संघाच्या वांगड्यांनी लेगीत शिक्षिकेची चूक नाशिल्ल्याचे भाग शिक्षणाधिकाऱ्यांक सांगलें. हाचेर आदारीत भाग शिक्षणाधिकाऱ्यांनी अहवाल सादर केला, अशें शिक्षण संचालकांनी सांगलें. हो प्रकार घडले उपरांत संबंदींत शिक्षिकेन दनपारां विद्यार्थ्याच्या आवय कडेन लेगीत चर्चा केल्या. आवयन सांजे दिवचल पुलीस स्टेशनांत वचून कागाळ नोंद केली.
शिक्षिके कडल्यान विद्यार्थ्याक मारपेट जावपाचे दोन प्रकार घडले. विठ्ठलापूर – सांखळे सरकारी प्राथमीक शाळेंतली घडणूक 25 नोव्हेंबराक घडली. पुलिसांनी भारतीय दंड संहितेचें कलम 323 आनी बाल हक्क कायद्याचें कलम 8 (2) खाला गुन्यांव नोंद केला. मजगतीं, आपणे विद्यार्थ्याक थापट मारूंक ना, अशे शिक्षिकेन पुलिसांक सांगलें.
मजगतीं, हाचे पयलीं विद्यालयांतल्या शिक्षिकेन विद्यार्थ्याक मारपेट करपाची कथीत घडणूक 9 सप्टेंबर दिसा घडिल्ली. हे विशींचो गुन्यांव पुलिशेंत नोंद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
