भांगरभूंय | प्रतिनिधी
एके शिक्षिकेची खात्या वतीन फाल्यां सुनावणी
भांगरभूंय । प्रतिनिधी
पणजीः वागाळी- कामुर्लेच्या श्री सरस्वती मंदीर मुळाव्या विद्यालयांत यत्ता चवथेंत शिकपी 9 वर्सां पिरायेच्या विद्यार्थ्याक अमानूश मारपेट केल्ल्या प्रकरणांत शिक्षण संस्थेन निलंबीत केल्ल्या आनी ते उपरांत अटकेची कारवाय जाल्ली सुजल गावडे आनी कनिषा गडेकार ह्या दोनूय शिक्षिकांक खात्या कडल्यान लेगीत निलंबीत करतले.
शिक्षण संस्थेन ह्या दोनूय शिक्षिकांक निलंबीत करीत सावन 15 दिसां भितर शिक्षण संचालकांक हे विशींचो निर्णय घेवचो पडटा. ह्या प्रकरणांतल्या दोगूय शिक्षिकांचेर अटकेची कारवाय जाल्ल्यान तांकां निलंबीत करचेंच पडटलें, अशें शिक्षण संचालक शैलेश झिंगडे हांणी शेनवारा ‘भांगरभूंय’ कडेन उलयतना स्पश्ट केलें.
ह्या दोगांतली एक शिक्षिका पूर्ण वेळ जाल्यार दुसरी कंत्राटी पद्दतीचेर आसा. तांतूंतले पूर्णवेळ शिक्षिकेची सुनावणी 12 सप्टेंबराक जावपाची आशिल्ली, पूण तिणें सुनावणे खातीर अतिरिक्त वेळ मागिल्ल्यान फाल्यां सोमारा तिची सुनावणी जातली. ह्या प्रकरणांत निर्णय घेवचे खातीर आपल्याक 19 सप्टेंबरा मेरेन मुजत आसा, अशें झिंगडे हांणी सांगलें.
मजगतीं, 2 सप्टेंबराक विद्यार्थ्यान पाठ्य पुस्तकाचीं दोन पानां पिजिल्ल्यान तिडकल्ले दुबावीत शिक्षिकांनी विद्यार्थ्याक स्टिलाचे पट्टेन येथिश्ट मारपेट केल्लो. तशेंच पिडीत भुरग्याच्या यत्ता तिसरेंत शिकपी चुलत आतेभावाक हे विशीं खंयूय उलयल्यार ताकाय मारपेट करपाची धमकी दिल्ली. ह्या प्रकरणांत मंगळारा पिडीत भुरग्याच्या बापायन कोलवाळ पुलिशेंत कागाळ दाखल केले उपरांत पुलिसांनी दुबावीत शिक्षिकां आड पयलीं भारतीय न्याय संहितेच्या कलम 118 (1), 126 (2), 351 (2) आनी 3 (5) तशेंच गोंय बाल कायदो कलम 82 आनी गोंय बाल कायदो कलम 8 बदला कलम 8 (2) हीं कलमां जोडून दोगूय शिक्षिकांक अटक केल्ली. ते आदीं शिक्षण संस्थेन तांकां सेवेंतल्यान निलंबीत केल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
