भांगरभूंय | प्रतिनिधी
मुख्यमंत्रीः विद्यार्थिनींक भेटयल्यो सायकली
भांगरभूंय । प्रतिनिधी
दिवचल: शिक्षण ही समक्षमीकरणाची बुन्याद आसा. उम्मीद 1000 सारके उपक्रम आमच्या तरणाट्यां खातीर संद निर्माण करपांत म्हत्वाची भुमिका घेतात, अशें मुख्यमंत्री डॉ. प्रमोद सावंत हांणी सांगलें. तशेंच गोंयच्या शिक्षणीक उदरगतीक चालना दिवचे खातीर जोड यत्नांचें म्हत्व स्पश्ट केलें.
शिक्षण आनी सक्षमीकरणाक चालना दिवचे खातीर एक म्हत्वाचें पावल म्हूण मुख्यमंत्री डॉ. सावंत हांणी आरबीएल बँकेच्या उम्मीद 1000 ह्या सीएसआर उपक्रमा खाला विद्यार्थिनींक सायकली आनी शालेय साहित्याचें वांटप केलें. ह्या वेळार ते उलयताले.
गोवा सीएसआर प्राधिकरणान आयोजीत केल्ली ही कार्यावळ सांखळेच्या रवीन्द्र भवनांत जाली. ह्या वेळार आरबीएल बँकेचे सरकारी बँकींग मुखेली रोहीत अग्रवाल, शिक्षण खात्याचे संचालक शैलेश झिंगडे आनी हेर अधिकारी हाजीर आशिल्ले.
आरबीएल बंक आनी गोवा सीएसआर प्राधिकरणा वांगडा गोंय सरकाराची भागिदारी गोंयच्या विद्यार्थ्यां खातीर पर्जळीत आनी अदीक समतापूर्ण फुडार घडोवपा खातीर सामुहीक बांदिलकीचेर उजवाड घालता, अशें मुख्यंमत्र्यान सांगलें. चलयांक उर्बा दिवपाच्या उद्देशान सुरू केल्लो हो उपक्रम शाळेंतली उपस्थिती आनी गरजेचें शिक्षणीक साहित्य मेळप ह्या सारक्या आव्हानांक फुडो करपाचो यत्न करता. दिल्ल्या सायकलींक लागून गतीशिलताय आनी उपस्थिती सुदरावपाची अपेक्षा आसा. चड करून गांवगिऱ्या वाठारांनी रावपी विद्यार्थ्यां खातीर जाल्यार शालेय साहित्य तांच्या शिक्षणीक उपक्रमांक मजत करपा खातीर गरजेची आसा, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
