भांगरभूंय | प्रतिनिधी
संध्या खाडिलकार: सत्तरी स. गोविंदशास्त्री भावे पाठशाळेंत वासंतीक वर्गाचो समारोप
वाळपय: भुरगेपणांतल्यान भुरग्यांक नैतीक शिक्षण शिकोवचें. गिमाळे सुटयेचो बरो उपेग करून न्यानांत भर घालची. शिक्षण फकत पोट भरपा खातीर न्हय तर समाजाच्या कल्याणा खातीर वापरपाक जाय अशें नगरगांव सरपंच संध्या खाडिलकार हांणी सांगलें. आमी हिंदू हाची जाणविकाय आमकां आसूंक जाय. आनी हिंदू धर्मा खातीर कितेंय करचें पडूं ताची लज बाळगुची न्हय. आमचीं देवळां पवित्र आसात. थंय नमस्कार करचो. शिकिल्ले वेद घरांत दर दिसा मोठ्यान वाचूंक जाय. समाजांत आदर्श नागरीक म्हणून वळख निर्माण करची अशें तिणें सांगलें.
आंबेडें सत्तरी हांगा स. गोविंदशास्त्री भावे पाठशाळेंत वासंतीक वर्गाच्या समारोप कार्यावळीक वेळार खाडिलकार उलयताली. ह्या वेळार मुखेल सोयरे म्हणून प्रा. वल्लभ केळकार हाजीर आशिल्ले. तशेंच पंच राजेंद्र अभ्यंकार, वेदमूर्ती श्रीधर भावे, गुरुजी वे. शा. सं. समीर केळकार हाजीर आशिल्ले.
वल्लभ केळकार हांणी आयच्या काळांत साधनेक व्हड म्हत्व दिवपाक जाय. वेदाचो अभ्यास तिगोवन दवरपाचो आसल्यार तो सतत करप गरजेचें. वैदीक शास्त्राचें शिक्षण समाजाक अर्पण करपाची मानसिकताय जाय. समाजांत भोंवतना लोक कशे वागतात हाचेर तांचो न्याय जाता. लोक गरीब आसले तरी ते काम करतात. पूण समाजांत वागणूक बरी दवरपाक जाय, अशें तांणी म्हणलें.
पंच राजेंद्र अभ्यंकार हांणी अभ्यासाचें खंयचें मळ भुरग्यांनी नेमचें. पूण शिकतना आपली संस्कृताय आनी वेद हांचें अध्ययन करचें.
श्रीधर भावे हांणी भुरगेपणारूच संस्कार येवपा खातीर, फुडाराक बरे नागरीक जावपा खातीर ह्या वर्गाचो बरोच फायदो जाल्ल्याचें सांगलें.
पाठशाळेंत वासंतीक वर्गाच्या समारोप कार्यावळीक भुरग्यांक प्रमाणपत्रां भेटयलीं. विशाल बर्वे हांणी उपकार मानले. पालक आनी भुरग्यांनी मनोगत उक्तायलें. श्रीधर भावे हांणी हो वर्ग घेवपाचो हेतू स्पश्ट केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
