भांगरभूंय | प्रतिनिधी
डॉ. नारायण देसायः शिक्षणांत बालगितां आनंद सुक्तां जावचीं
भांगरभूंय । प्रतिनिधी
केरी- सत्तरीः शिक्षणांत भुरगो होच शिक्षणाचो केंद्रबिंदू आशिल्ल्यान तें बालकेंद्रीत करपाक नेमान यत्न जावंक जाय. शिक्षण प्रक्रियेंत भुरग्यांक खोस मेळूंक जाय हे खातीर बुन्यादी पांवड्या वयल्या शिक्षणांत भुरग्यांक खोसदिणें अणभव दिवपाक जाय. भुरगें निर्भय जातलें जाल्यार तांकां मेकळ्यापणान व्यक्त जावपाची संद मेळपाक जाय. ते खातीर तांकां स्वातंत्र्य जाय आसता, अशें डॉ. नारायण देसाय हांणी सांगलें.
भुमी प्रकाशन सावर्शें, गोवा कोंकणी अकादेमी आनी डॉ. दादा वैद्य शिक्षणशास्त्र म्हाविद्यालय हांणी जोडपालवान आयोजीत केल्ले बालगीत लेखन कार्यशाळेच्या उक्तावण सुवाळ्यांत डॉ. नारायण देसाय हांणी मुखेल सोयरे म्हूण उलयतना सांगलें.
भुरग्यांक हांसत खेळत व्यक्त जावंदी. ते खातीर तांकां व्यक्त जावपाक स्वर जाय आसता. भुरग्यांचो हो स्वर म्हणल्यारूच तांचें गीत, मुक्त स्वरांतलें हें गीत म्हणल्यारूच भुरग्यांचो संवसार आसता. त्या संवसारांत तांकां गुल्ल जावंदी, खेळुंदी, गांवदी. कारण हीं गितांच तांकां खोस दितात. खोसदिणें अणभव दितात. ते खातीर ह्या गिताचें तांचें जिणेंत सुमारा भायर म्हत्व आसता. बुन्यादी पांवड्या वयलीं हीं गितांच भुरग्यां खातीर समाज सुदारणा गितां, स्फूर्त गितां, आनंद गितां जावचीं. कारण हीं बालगितांच तांचे जिणेंतली आनंदसुक्तां आसतात, अशें डॉ. देसाय हांणी सांगलें.
हे कार्यशाळेंत बालगितां रचतना रचनाकाराक फक्त आयचोच न्हय जाल्यार फुडाराचो विचार करून बालगितां रचचीं पडटलीं. ते खातीर रचनाकाराक ल्हान भुरगें जावन भुरग्यांचे नदरेंतल्यान संवसार पळोवचो पडटलो. दोन दिसांची ही कार्यशाळा आमकां विशाल नदर दितलीच, तेच वांगडा भुरग्यांची जिणूय शिकयतली. जीं फुडें बुन्यादी पांवड्या वयले शिक्षण प्रक्रियेंत सेगीत सांगात दितली.
कार्यशाळेच्या उक्तावण सुवाळ्याक कोंकणी अकादेमीचे उपाध्यक्ष वसंत सावंत हे अध्यक्षपदार आशिल्ले. मानाचे सोयरे म्हूण डॉ. दादा वैद्य शिक्षणशास्त्र म्हाविद्यालयाचे प्राचार्य डॉ. जॉन मॅथ्यू हाजीर आशिल्ले. तांचीं ह्या वेळार मार्गदर्शन करपीं उलोवपां जालीं. तशेंच कार्यशाळेचे मार्गदर्शक तुकाराम शेट आनी सुनील पालकार हेवूय हाजीर आशिल्ले.
दोन दीस चलिल्ले कार्यशाळेंत शिक्षक, पूर्व मुळाव्यो शिक्षिका आनी विद्यार्थी मेळून वट्ट 60 प्रतिनिधींनी वांटो घेतिल्लो.
प्रा. संजय गोवेकार हांणी येवकार दिलो. भुमी क्रिएशनाचे अध्यक्ष झिलू गांवकार हांणी प्रास्तावीक केलें. प्रा. अनील वेर्णेंकार हांणी सुत्रसंचालन केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
