शिक्षण पद्दतींत जाल्ले बदल पालकांनी समजून घेवचे

भांगरभूंय | प्रतिनिधी

गोविंद तारीः सावयवेरेंचे बाल ग्रामसभेंत उलो

भांगरभूंय । प्रतिनिधी

सावयवेरें: नवीन शिक्षण धोरणा प्रमाण शिक्षण पद्दतींत जे बदल जाल्यात ते पालकांनी तशेंच भुरग्यांनी समजून घेवपाक जाय. भुरगीं हीं अनुकरणप्रीय आसतात. हे खातीर पालकांनी वेळ काडून आपल्या भुरग्यां मुखार बरे संस्कार करपी गजाली दवरपाक जाय. अशें केल्यारूच आयची पिळगी फुडारांत स्वताच्या पांयार उबीं रावतलीं, अशें शिक्षक गोविंद तारी हांणी सांगलें.

वेरें- वाघुर्में पंचायतीची बाल ग्रामसभा पंचायत वाचपघराच्या सभाघरांत आयतारा जाली. ही पयलीच बाल ग्रामसभा आशिल्ली. सध्या भुरग्यांच्यो परिक्षा चालू आसात, ताका लागून हे सभेक भुरग्यांची हाजेरी तशी उणीच आशिल्ली. हे सभेंत सुमार 22 भुरग्यांनी वांटो घेतलो. हे सभेंत मुखेल सोयरे म्हूण गोविंद तारी उलयताले.

ह्या वेळार अ‍ॅड. दिगंबर नायक, सरपंच शोभा पेरणी, उपसरपंच बाबू गावडे, सचीव भूषण तावडे, पंच स्वाती पालकार, रोहन तारी, नवनाथ वेलकासकार, अक्षय नायक हाजीर आशिल्ले.

भुरग्यांक चार वण्टी भितर आडावन दवरूं नाकात. पालकांनी तांकां पर्यावरण, समाजिकतायेची जाणीव करून दिवप गरजेचें आसा. जीं भुरगीं एकाद्या मळार फिशाल आसात, ज्या भुरग्यांक जें मळ आवडटा त्याच मळार तांणी आपले करियर पर्जळीत करचें, अशें गोविंद तारी हांणी सांगलें. तशेंच आपलें म्हणणें पटोवपा खातीर तांणी थ्री इडियट ह्या चित्रपटाची देख दिली.

अ‍ॅड. दिगंबर नायक हांणी बाल हक्का विशीं म्हायती दिली. 6 ते 14 वर्सां पिराये मेरेनच्या दरेका बुरग्याक फुकट शिक्षण, जात, धर्म भेदभाव, दिव्यांगत्व, बाल मजुरी ह्या संविधानांत आशिल्ल्या भुरग्यांच्या मुळाव्या हक्का संबंदांतली म्हायती दिली. तशेंच दरेका भुरग्यान आपलो मुळावो अधिकार वापरचो, असो तांणी उलो मारलो.

भुरग्यांक सक्षम करून तांच्या अधिकाराची जाणीव करून दिवचे खातीर बाल ग्रामसभेचो मुखेल उद्देश आसा, अशें पंचायत सचीव भूषण तावडे हांणी सांगलें. तांणी भुरग्यां खातीर आशिल्ल्या विवीध सरकारी येवजण्यां संबंदांतली खोलायेन म्हायती दिली. भुरग्यांचे सुरक्षे संबंदांत तशेंच पालकांक लेगीत तांणी कांय सुचोवण्यो केल्यो.

हे सभेंत अथर्व, भार्गव, जानवी, वैशाली, शौर्य ह्या भुरग्यांनी गांवांतल्यो कांय समस्या मांडल्यो. तातूंत मुखेलपणान दनपारां शाळा वा कॉलेज सुट्टा. त्या वेळार भुरग्यांक फोंडेंच्यान सावयवेरें मार्गान वचपी एकूय खाजगी वा कदंब बस नाशिल्ल्यान घरा पावपाक कळाव जाता. घरा वचपा खातीर भुरग्यांचे खूब हाल जातात. ते खातीर दनपारच्या वेळार बशीची वेवस्था करची, अशी तांणी विनवणी केली.

कोणीर आनी वाघुर्मेच्या मैदानाचें दुरुस्तीकाम हातांत घेवप, पाली वाठारांत गौतम पालकार ते सरकारी हायस्कुला मेरेन पक्की वाट तयार करप, वेलकास वाड्या वयले वाटेची दुरुस्ती करप अश्यो समस्या भुरग्यांनी मांडल्यो.

ग्रामपंचायत विकास आराखड्या खाला भुरग्यांच्यो समस्या आनी प्रस्ताव सोडोवपाचो यत्न करतले, अशें ह्या वेळार सचिवान सांगलें. सोना सावयकार हांणी सुत्रनिवेदन केलें जाल्यार शोभा पेरणी हांणी उपकार मानले.