शिक्षण केन्नाच थांबना, सदांच शिकत रावचें

भांगरभूंय | प्रतिनिधी

उपराष्ट्रपती धनखडः केएलई अॅकॅडमी हायर एज्युकेशनाचो जालो दीक्षांत समारोह

बेळगांवः केएलई अॅकॅडमी ऑफ हायर एज्युकेशन अँड रिसर्च, बेळगांवचो 14 दीक्षांत समारोह हांगा आयज जालो.

मुखेल सोयरे भारताचे उपराष्ट्रपती जगदीप धनखड, कर्नाटकाचे राज्यपाल थावर चंद गहलोत हांचे हाजिरेंत सुवाळो जालो. तातूंत पयलेच फावटीं अमेरिकेंतल्या फिलाडेल्फियाच्या थॉमस जेफरसन विद्यापिठाचे उप प्रॉव्होस्ट डॉ रिचर्ड जेकब डर्मनाक मानाची डॉक्टरेट पदवी भेटयली.

ह्या दीक्षांत समारोहांत भलायकी विज्ञानाच्या वेगवेगळ्या विशयांत वट्ट 1739 पदवी दिल्यो. तातूंत 45 भांगरा पदकां भेटयलीं. 30 पीएच.डी., 13 पोस्ट- डॉक्टरल (डी.एम./एम. च.), 644 पदव्युत्तर, 1023 पदवीधर, 9 पदव्युत्तर डिप्लोमा, 4 डिप्लोमा, 5 फेलोशीप आनी 11 प्रमाणपत्रां दिलीं. ह्या वेळार दोन गोंयकार विद्यार्थ्यांचोय भोवमान जालो.

विद्यापिठाचे कुलगुरू डॉ. प्रभाकर कोरे हांणी विद्यापिठा विशीं म्हायती दिली. भारत सरकाराच्या राष्ट्रीय संस्थांच्या क्रमवारी चौकटींत (निफ्रा) पयल्या शंबर विद्यापिठां मदीं ह्या विद्यापिठाक मान्यताय मेळ्ळ्या अशें डॉ. कोरे हांणी फुडें सांगलें. उपरांत कुलगुरू डॉ. नितीन गंगाने हांणी काहेराच्या कामगिरीचेर अहवाल सादर केलो.

उपराष्ट्रपती धनखड हांणी विद्यार्थ्याक शिक्षणांत उत्कृश्ट कामगिरी चालू दवरपाचो उलो मारलो. कारण शिक्षणाच्या मळार उत्कृश्ट कामगिरी करपाक आनी संद वाडोवपाक सोदपी लोकां खातीर आतां “ संदींची यंत्रणा” उपलब्ध आसा.

“शिकप केन्नाच थांबना हें विसरूं नाकात, देखून सदांच शिकत रावचें. तुमचें शिक्षण राष्ट्रा खातीर एक संपत्ती थारतलें अशें धनखड हांणी सांगलें. विद्यार्थ्यांक अर्थीक फायद्याचेर लक्ष केंद्रीत करूंक नाकात आनी सेवा हें आपले वेव्हाराचें वा समाज सेवाचें बोधवाक्य म्हणून दवरचें असो सल्लो तांणी दिलो. डॉ कोरे हांकां हांव संसदेंतलो सहकारी म्हणून वळखता. भलायकी आनी शिक्षणाच्या कामा खातीर ते खर यत्न करीत आयल्यात अशें तांणी सांगलें.

केएलईचे अध्यक्ष डॉ. प्रभाकर कोरे हांणी उपराष्ट्रपती जगदीप धनखड आनी ताची घरकान्न डॉ सुदेश हांचो भोवमान केलो.

धनखड आनी राज्यपाल थावर चंद गहलोत हांकां भगवान बसवेश्वराची मूर्त भेटयली. ह्या वेळार प्रा डॉ चंद्र एस मेटगुड, रजिस्ट्रार प्रो डॉ एमएस गणचारी हाजीर आशिल्ले.