शिक्षण अर्द्यार उरलां? भिवपाची गरज नाः मुख्यमंत्री

भांगरभूंय | प्रतिनिधी

स हजार रुपया भरुन धावी परिक्षेत परतून पास जावप आतां शक्य

पणजीः यत्ता धावी नापास जाल्ल्या भुरग्यांक धावेचें शिक्षण पुराय करपा खातीर आतां भायल्या परिक्षा केंद्रांनी 40 हजार रुपया खर्च करपाची गरज पडची ना. हे खातीर राज्यांतल्या बाराय म्हालांनी दरेकी एक शाळा संलग्न करपाचे निर्देश शालांत मंडळाक दिल्या. ते खातीर चडांत चड 6 हजार रुपया भरुन धावेचें परिक्षेत परतून पास जावप आतां शक्य जातलें, अशी म्हायती मुख्यमंत्री डॉ. प्रमोद सावंत हांणी दिली.
गोंय शालांत मंडळाक सोमारा 50 वर्सां पुराय जालीं. पर्वरे जाल्ले गोंय शालांत मंडळाच्या भांगराळ्या महोत्सवा निमतान मुख्यमंत्री उलयताले. ह्या वेळार पर्यटन मंत्री आनी थळावे आमदार रोहन खंवटे, मंडळाचे वांगडी तशेंच वास्कोचे आमदार दाजी साळकार, मंडळाचे चेअरमन भगिरथ शेटये आनी शिक्षण संचालनालयाचे संचालक शैलेश झिंगडे हजर आशिल्ले.
गोंय मनीस बळ उदरगत महामंडळांतले आठवी पास जाल्ले कर्मचारी आसात तांकां धावेचें शिक्षण पुराय करपाची संद आमी दिल्या. सुरक्षा रक्षक पदा वेल्यान ते एमटीएस पदा मेेरेन वच्चें ह्या हेतान तांच्या धावेच्या शिक्षणाचो खर्च हें सरकार करता, अशें मुख्यमंत्र्यान म्हणलें.
मात शालांत मंडळ सोडून भायल्या परिक्षा केंद्रान धावेची परिक्षा दितले आसत जाल्यार तांकां 25 हजार रुपया मेरेन खर्च करचेपडटात. कांय केंद्रां 40 हजार मेरेन शुल्क मागतात. देखून ह्या विद्यार्थ्यांक थाकाय दिवपा खातीर दरेक म्हालांतली एक शाळा संलग्न करपाचे निर्देश शालांत मंडळाक दितले. फक्त शिकोवपाचें शुल्क रु. 1 हजार आनी पुस्तकांचें शुल्क रु. 6 हजार मेळून वट्ट स हजार भरून परिक्षा परत दिवपाक मेळटली, अशी म्हायती मुख्यमंत्र्यान दिली.
हे विशीं पयली तरतुद आशिल्ली. मात हे प्रक्रियेक आडमेळीं खूब येतलीं. आतां ही प्रक्रिया सुटसुटीत केल्या. एकूय भुरगो धावी नापास उरचो न्हय असो निश्‍चेव सरकारान केल्ल्याचें मुख्यमंत्र्यान सांगलें.
सध्या जे भुरगे आठवी पास आसात तांकां 2 वर्सां आयटीआय प्रशिक्षण दिवन आमी धावी पास प्रमाणपत्र दितात आनी जे धावी पास आसात तांकांय 2 वर्सां आयटीआय प्रशिक्षण दिवन 12 वी पास प्रमाणपत्र दिता. तांचे खातीर भाशेचो पेपर लेगीत काडून उडयला, अशें मुख्यमंत्र्यान म्हणलें.
शिक्षकांनी भुरग्यांचो टेलंट वळखपाक जाय. तांणी पदवी घेवन डॉक्टर, इंजिनयर जावपाची गरज ना. तांचे टेलंट वळखून तांची कुशळटाय वाडोवची आनी फुडलो मार्ग दाखवचो. हे भुरगे आपलो फुडार स्वता थारायतले. हें काम पालका कडेन जावपाक शकना. देखून शिक्षकांनी ही गजाल सक्तीन करची, असो उलो मुख्यमंत्र्यान मारला.