भांगरभूंय | प्रतिनिधी
राज्यांतल्या ५० हजार विद्यार्थ्यांक पोर्टलाचो लाव
पणजी : शिक्षणाचो मुळावो पांवडो ते उच्च शिक्षणा मेरेन विद्यार्थ्यां खातीर राज्य आनी केंद्र सरकाराच्यो जायत्यो शिश्यवृत्ती (स्कॉलरशिप) येवजण्यो आसात. ह्या येवजण्यां खातीर ऑनलायन स्वरूपांत अर्ज करप शक्य जावचें म्हणून सरकारान खास पोर्टल सुरू केलां. चीफ मीनीस्टर्स प्रीमॅट्रीक ऍन्ड पोस्टमॅट्रीक स्कॉलरशिप पोर्टलाचें मुख्यमंत्री डॉ. प्रमोद सावंत हांचे हस्तुकीं उक्तावण जालें.
मंत्रालयांत जाल्ले कार्यावळीक समाज कल्याण खात्याचे मंत्री सुभाष फळदेसाय हजर आशिल्ले. https://cmscholarship.goa.gov.in/flogin.aspx अशें ह्या पोर्टलचें नांव. राज्यभरचे विद्यार्थी ह्या पोर्टलाचेर अर्जा सयत प्रमाणपत्रां सादर करपाक शकतात. ह्या पोर्टलाचो राज्यांतल्या ५० हजार विद्यार्थ्यांक लाव जातलो, अशें डॉ. सावंत हांणी म्हणलें. जायते विद्यार्थी शिश्यवृत्ती खातीर पात्र आसतात, मात ते अर्ज करिनात. पोर्टलाचेर अर्ज सादर केले उपरांत १५ दिसांनी तांकां शिश्यवृत्तीचे पयशे मेळटले. पयशे मेळपा खातीर चडांत चड एक म्हयनो लागपाक शकता. एससी, एसटी, ओबीसी तशेंच आर्थिक नदरेन मागासलेल्या विद्यार्थ्यां खातीर शिक्षण, समाज कल्याण खात्याच्यो येवजण्यो आसात. ह्या सगल्या येवजण्यांच्या शिश्यवृत्ती खातीर ह्यो पोर्टलाचेर अर्ज करप शक्य जातलें. नर्सींग तशेंच हेर शिक्षणा खातीर जायते विद्यार्थी हेर राज्यांनी वतात. तांकां ४० हजार रूपयां मेरेन शुल्का खातीर शिश्यवृत्ती मेळपाची तरतूद आसा. शुल्क भरल्या उपरांत तांच्यो पावत्यो आनी हेर प्रमाणपत्रां सादर करचीं पडटलीं. विद्यालयांच्या मुख्याध्यापकांकूय ह्या पोर्टलाचीम्हायती दितले, अशें डॉ. सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
