भांगरभूंय | प्रतिनिधी
एनईपीच्या कार्यवाही खातीर इतिहासीक बदल
भांगरभूंय | प्रतिनिधी
पणजी : राष्ट्रीय शिक्षण धोरणाच्या (एनईपी) कार्यवाही खातीर नवें शिक्षणीक वर्स 1 एप्रील सावन सुरू करपाचो इतिहासीक निर्णय शिक्षण खात्यान घेतला. यत्ता सवी ते धावी आनी बारावेचे वर्ग एप्रीलांत सकाळीं 11.30 वरां मेरेन चलतले. 1 मे ते 3 जून मेरेन गिमाळी सुटी आसतली. उपरांत 4 जून सावन आदले वरीं वर्ग सुरू जातले. शिक्षण संचालकान हे विशींचें परिपत्रक जारी केलां.
नव्या राष्ट्रीय शिक्षण धोरणा प्रमाण सप्तकाक शिकोवपाचीं 36 ते 39 वरां जावप गरजेचीं. हीं वरां भरून येवपाक एक तर शिक्षणीक दीस वाडोवचे पडटले वा शाळा/ विद्यालयांचो वेळ वाडोवचो पडटलो. शिकोवपाचीं वरां भरून काडपाक एप्रीलांत वर्ग घेवपाचो निर्णय जाला, अशी म्हायती सुत्रांनी दिली. 1 ते 30 एप्रील मेरेन सकाळीं 11.30 मेरेन वर्ग घेतिल्ल्यान शिकोवपाचीं वरां भरून येतलीं, अशेंय तांणी सांगलें. आदीं शिक्षणीक वर्स जूना सावन सुरू जातालें. हाका लागून निमाणी परिक्षा जाले परांत विद्यार्थ्यांक एप्रीला उपरांत सुटी आसताली. म्हयन्या परस चड सुटी मेळटाली. आतां ही प्रथा बंद जातली. अंदूं णववे खातीर राष्ट्रीय शिक्षण धोरणाची कार्यवाही सुरू जाल्या. येवपी शिक्षणीक वर्सा सवी आनी धावे खातीर एनईपी लागू जातली.
धावेचो निकाल लागता म्हणसर यत्ता इकरावेचे प्रवेश प्रक्रियेक उशीर जाता. हाका लागून इकरावेचें शिक्षणीक वर्स ह्या वर्सा जुनांतूच सुरू करपाचो सरकारान निर्णय घेतला. मजगतीं, कांय समाज वावुरप्यांनी ह्या निर्णयाक विरोध केला.
शाळेच्या वेळांत, सुटयांनी बदल ना
राष्ट्रीय शिक्षण धोरणाची अंमलबजावणी केले उपरांत शाळांचो वेळ बदलचो पडचो ना. अशें जावचें न्हय हे खातीर शिक्षणीक वर्स 1 एप्रील सावन सुरू करपाचो निर्णय घेतला. हाका लागून शाळांचो कालावधी आदले वरीच उरतलो. ह्या निर्णयाक लागून गिमाची वा हेर सुटयांनी कसलोच बदल जावचो ना, अशें शिक्षण संचालक प्रसाद लोलयेंकार हांणी स्पश्ट केलें. बिरेस्तारा ते प्रसारमाध्यमां कडेन उलयताले.
लोलयेंकार हांणी सांगलें, गोंयांतल्या खूबश्या शाळांनी सकाळीं एक जाल्यार सांजे वेळार दुसऱ्या यत्तांचे वर्ग चलतात. ताका लागून शाळांचो वेळ 2 वरांच्या फुडें व्हरपाक मेळचो ना. एप्रीलांत शाळा सुरू केल्ल्यान शाळांचो वेळ वाडोवचो पडचो ना. शिक्षणीक वर्स 1 एप्रील सावन सुरू जालें तरीय गीम, चवथ, नातलां वा दिवाळीचे सुटयेंत कसलोच बदल जावचो ना. दिवाळेचे सुटयेंत कांय दीस शाळे भायले उपक्रम चालीक लावपा संबंदांत आमी विचार करतात. नव्या निर्णया संबंदांत शुक्रारा सगळ्या शाळांच्या मुख्याध्यापकांची बसका घेतले. ते उपरांत शिक्षण मळा वयल्या हेर भागधारकांची बसका घेवन उपरांतूच निर्णयाची अंमलबजावणी जातली. हे आदीं शिक्षणीक वर्सांतलें एक टर्म व्हड जाल्यार दुसरें ल्हान आसलें. नव्या निर्णयाक लागून दोनूय टर्मांत समानताय येतली. केंद्र सरकाराची माध्यान्ह आहार येवजण घेवचे कातीर एक थारावीक वेळ भरून काडप गरजेचें आसता. 1 एप्रील सावन शाळा सुरू केल्यार हो वेळ भरून येवप सहज शक्य आसा, अशें लोलयेंकार हांणी सांगलें.
अ. गो. माध्यमीक शिक्षकांचो विरोध
एप्रीलान उबाळ्याचें प्रमाण चड आसता. हाचो विद्यार्थीं तशेंच शिक्षकांक शिकोवपाक त्रास जातलो. हाका लागून एप्रीलांत शिक्षणीक वर्स सुरू करपाच्या निर्णयाचो फेरविचार जावचो, अशी मागणी अखील गोंय माध्यमीक शिक्षक संघटणेन केल्या. हे विशींचे निवेदन संघटणेची अध्यक्ष सुरज विक्टोरिया हांणी शिक्षण संचालकांक दिलां.
विद्यार्थीं तशेंच शिक्षकाक जूनांत वर्ग सुरू करपाची सवंय जाल्या. गोंयांत उबाल्याचें प्रमाण चड आसता. वर्गांत उबाळ वाडलो जाल्यार शिकोवपाक आनी शिकपाक त्रास जाता. हाका लागून जूनांत शिक्षणीक वर्स सुरू जावप हिताचें आसा, अशें विक्टोरिया हांणी म्हणलां.
ह्या निवेदनाचो आमी विचार करतले. एनईपी समितीन शिफारस केल्ले प्रमाण जूनांत शिक्षणीक वर्स सुरू करपाचो निर्णय जाला, अशें शिक्षण संचालक शैलेश झिंगडे हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.