भांगरभूंय | प्रतिनिधी
पणजी : गोंयांतलें सध्याचे वीज मिटर बदलून ताचे सुवातेर स्मार्ट वीज मिटर बसोवपा खातीर सरकारान डिजी स्मार्ट नेटवर्क प्रायव्हेट लिमिटेड हे कंपनीची नेमणूक केल्या. पयल्या टप्प्यांत वेवसायीक आनी थ्री फेस मिटर्स बदलतले. तशेंच पीपीपी तत्वाचेर डॉ. श्यामाप्रसाद मुखर्जी स्टेडियम लिजाचेर दितले. मात सरकारी कार्यावळीं खातीर कसलेच तरेचें भाडें कंपनी घेवची ना.
मुख्यमंत्री डॉ. प्रमोद सावंत हांणी मंत्रीमंडळ बसके उपरांत निर्णयांची म्हायती पत्रकार परिशदेत दिली. राज्यांतले साडेसात लाख वीज मिटर बदलून ताचे सुवातेर स्मार्ट मिटर बसयतले. पीपीपी तत्वाचेर डॉ. श्यामाप्रसाद मुखर्जी स्टेडियम डोम एंटरप्रायझेस प्रायव्हेट लिमिटेड कंपनीक लिजाचेर दितले. सरकारी कार्यावळीं सोडल्यार हेर कार्यावळीं खातीर ही कंपनी भाडें घेतली. म्हयन्याक कंपनी कडल्यान सरकाराक 25 लाख 25 हजार रूपयांचो महसूल मेळटलो.
विकसीत गोंय 2047 करपाचें लक्ष्य 2037 मेरेन पुराय करपाचें उद्दीश्ट आसा. ह्या प्रकल्पाचें काम कॉर्पोरेट चाणाक्य सर्वीसेसीन सुरू केलां. प्रकल्पाचें मंत्रीमंडळा मुखार सादरीकरण जालां. तज्ञ तशेंच लोकां कडल्यान सुचोवण्यो मागयल्यात. ह्या प्रकल्पाचो शुभारंभ बेगिनूच करतले, अशें डॉ. प्रमोद सावंत हांणी सांगलें. विकसीत गोंय 2047 चें उद्दिश्ठ पांवड्या पांवड्यान पुराय करपाची येवजण आसा. विकसीत गोंय 2030, विकसीत गोंय 2037 अशें टप्प्या प्रमाण आराखडे तयार जातलें.
न्हावेली – सांखळे आयडीसीची 45 हजार चौखण मिटर जमीन किर्लोस्कर प्रायव्हेट लिमिटेड कंपनीक दिवपाचो निर्णय जाला. ही जमीन आमोणा पावर प्लांटा कडेन आशिल्ली. किर्लोस्कार प्रायव्हेट लिमिटेडच्या प्रकल्पाक लागून गोंयांत नवी गुंतवणूक जातली आनी रोजगार तयार जातलें, अशें मुख्यमंत्री डॉ. प्रमोद सावंत हांणी सांगलें.
…..
मंत्रीमंडळाचे हेर म्हत्वाचे निर्णय :
– होमीओपॅथी दोतोरां खातीर नोंदणी सक्तीची करपाची तरतूद आशिल्ल्या विधेयकाक मान्यताय.
– पिवपाच्या उदका खातीर (डीपार्टमेंट ऑफ ड्रिंकींग वॉटर) स्वतंत्र खातें तयार केल्ल्या खात्याच्या नेमांक मान्यताय.
– शिरोडेंच्या आयुर्वेद आनी होमिओपथी महाविद्यालयाक मेळटलें सरकारी अनुदान
– नावेले- सांखळेच्या किर्लोस्कर कंपनीच्या प्रकल्पा खातीर जमीन.
– विकसीत गोंय 2047 आराखड्याचें सादरीकरण.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
