भांगरभूंय | प्रतिनिधी
आमचे जायते विद्यार्थी दुबळे अर्थीक फाटभुंयेचे आसात, हें समजून महाविद्यालयाचे कर्मचारी तांकां सरकारी आनी बिगर सरकारी शिश्यवृत्ती कडेन जोडपाक अथक यत्न करतात.
शांततायेन भरिल्ल्या बोरी गांवांत आशिल्लें स्वामी विवेकानंद वाणिज्य महाविद्यालय पारंपरीक शिक्षणा भायर शिकयता. दरेका विद्यार्थ्याक उदरगत करपाक मदत करपा खातीर तयार केल्ली एक व्यापक आदार पद्दत दिता. विद्यार्थ्यांक तांच्या शिक्षणीक, वैयक्तीक आनी शारिरीक कल्याणा प्रमाण वेगवेगळ्या सेवांचो फायदो जाता. आमच्या विद्यार्थिनीं खातीर हें महाविद्यालय अपवादात्मक सुविधा दिता. आमी बायलांच्या भलायकेचेर लक्ष केंद्रीत करपी सत्रां घडोवन हाडटात. तातूंत आहार आनी स्वताची जतनाय ह्या सारक्या म्हत्वाच्या विशयांचो आस्पाव आसा. आमचो भलायकी जतनाय कक्ष हो गरज पडल्यार सुशेग आनी रोखडेंच लक्ष दिवपाची सुवात दिता. आनी नेमान समुपदेशन केल्यार तांच्या मानसीक आनी भावनीक कल्याणाक आदार जाता.
आमच्या विद्यार्थ्यांच्या वेगवेगळ्या आकांक्षांक मान्यताय दिवन आमी फॅशन डिझायनींग, टेलरिंग आनी ब्युटीशियन कुशळटायेचे प्रमाणपत्र अभ्यासक्रम लेगीत शिकयतात. अभ्यासा वांगडा वेव्हारीक गिन्यान दिवन तांकां सशक्त करतात. आमचे जायते विद्यार्थी दुबळे अर्थीक फाटभुंयेचे आसात, हें समजून महाविद्यालयाचे कर्मचारी तांकां सरकारी आनी बिगर सरकारी शिश्यवृत्ती कडेन जोडपाक अथक यत्न करतात. दीपाली देसाय फावंडेशन लेगीत पात्र विद्यार्थ्यांक उदारपणान आदार दिता, आनी आमचे कर्मचारीय वैयक्तीक अर्थीक आदार दितात. अर्थीक आडमेळीं उच्च शिक्षणाक आडखळ हाडनात हाची खात्री सगले करतात. शारिरीक शिक्षण आनी खेळ विभाग खेळांत वांटो घेवपी विद्यार्थ्यांक सक्रीयपणान प्रोत्साहन दिता, नेमान प्रशिक्षण दिता आनी थळाव्या आनी राष्ट्रीय पांवड्यार तांच्या सहभागाक आदार दिता. तांच्या आहाराची गरज लेगीत पुराय करता.
आमचें वाचनालय हें एक जिवें केंद्र. हांगा नेमाळीं आनी हेर छापील आनी डिजिटल ह्या दोनूय साधनांचो व्हडलो संग्रह आसा. आमी नेमान भाशणांय आयोजीत करतात. सगळें आमच्या कोहा ओपॅक आनी वायफाय वरवीं मेळूं येतात. फकत शांत अभ्यासाच्या जाग्या परस चड, संवाद कुशळटाय आनी व्यक्तिमत्व विकास वाडोवपा खातीर रीडर्स क्लब आनी एन. डी. एल. क्लब हांच्या सहकार्यान आयोजीत केल्ल्या कार्यावळीं सयत ही चर्चेची सुवात. वाचनालय स्पर्धात्मक परिक्षां खातीर पुस्तकां सयत कारकीर्द सल्लागार साधनसामुग्री दिता. नॅशनल डिजिटल लायब्ररी ऑफ इंडिया कार्यावळीं खातीर विद्यार्थ्यांची नोंदणी सुलभ करता. आमचो प्रशिक्षीत लायब्ररी कर्मचारी मदत करपाक सदांच तयार आसता. संशोधन कार्यावळींक आदार दिवपा खातीर, आमची महाविद्यालयीन लायब्ररी मायक्रोसॉफ्ट 365 आनी सायस्पेस सारकिल्या एआय-पावर्ड साधनांचेर प्रवेश दिता, कर्मचारी आनी विद्यार्थ्यांक साहित्य पुनरावलोकनां आनी संबंदीत कामां करपाक मदत करता.
आमचो समुपदेशन कक्ष खासा परिणामकारक आसा, विद्यार्थी- शिक्षक गुणोत्तर अनुकूल आशिल्ल्यान वैयक्तीक लक्ष दिवंक मेळटा. कक्षाक आदार जाय आशिल्ल्या विद्यार्थ्यांक शिक्षक वांगडी सक्रीयपणान मार्गदर्शन करतात. आमची मार्गदर्शन कार्यावळ विद्यार्थ्यांक ग्रंथपाला सयत शिक्षकां वांगडा सप्तकी मार्गदर्शन सत्रां खातीर जोडटा.
विद्यार्थ्याची सुवात वळखून म्हाविद्यालय बेतोडा, शिरोडा आनी फोंडें सावन फुकट येरादारीची वेवस्था करता, जाका लागून सगळ्यांक सोंपेपणान प्रवेश मेळटा. आपत्कालीन परिस्थितींत कर्मचारी वांगडी विद्यार्थ्यांक घरा सोडपाक लेगीत फुडाकार घेतात. ह्या सगळ्या सेवांक आदार दिवपी म्हणल्यार आमचो उच्च पात्रताय आशिल्ल्या प्राध्यापकांचो पंगड, चडश्यांनी आपल्या खाशेल्या क्षेत्रांत डॉक्टरेट पदवी घेतल्या. प्राध्यापक आनी प्राचार्य अच्युत पेडणेकार हांच्या फुडारपणाक लागून तांच्या 25 वर्सांच्या अणभवाक लागून शिक्षणीक वातावरण आनीक घटमूट जाता.
स्वामी विवेकानंद वाणिज्य महाविद्यालयांत, आमच्या विद्यार्थ्यांच्या सर्वांगी उदरगतीचें पोशण करपाक, तांकां शिक्षणीक आनी वैयक्तीक नदरेन यशस्वी जावपाक जाय आशिल्लीं साधनां आनी आदार दिवपाक आमी सदांच तत्पर आसतात. आमी आमच्या विद्यार्थ्यांच्या जिणेंत कसो खरो बदल घडयतात हाचे विशीं चड जाणून घेवपाक आमी तुमकांय काॅलेजींत येवपाचें आमंत्रण दितात.
– सोनिया मुकेश देसाय
91587 69312
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
