भांगरभूंय | प्रतिनिधी
गोविंद पर्वतकार : शिक्षण उदरगत म्हामंडळा वतीन कार्यशाळा
भांगरभूंय । प्रतिनिधी
पणजी : विद्यार्थ्यांचे शिक्षणीक उदरगतींत हाचे फुडें समुपदेशकाची भुमिका म्हत्वाची थारतली. प्रशिक्षणाचो चडांत चड उपेग करून समुपदेशकांनी समुपदेशनाच्या आपल्या कामाक न्याय दिवचो, अशें गोंय शिक्षण उदरगत म्हामंडळाचे अध्यक्ष प्रा. गोविंद पर्वतकार हांणी म्हणलें.
विद्यालयांतल्या 113 समुपदेशकां खातीर म्हामंडळान समुपदेशन कार्यशाळेचें आयोजन केल्लें. कार्यशाळेच्या उक्तावणा वेळार अध्यक्ष गोविंद पर्वतकार हांणी हें मत मांडलें.
पर्वरेच्या संजय स्कुलांत ही कार्यावळ जाली. उक्तावण सुवाळ्याक शिक्षण संचालक शैलेश झिंगडे आनी हेर मानेस्त हाजीर आशिल्ले. यूएन टॅकचे सीईओ सुल्ताना खान, धुरकीज पंडीत विद्यापीठ, नेपाळचे संचालक अजीत कोयराला, जीईडीसीचे वेवस्थापकी संचालक सागर गावडे हाजीर आशिल्ले.
शिक्षण संचालक शैलेश झिंगडे आनी प्रा. गोविंद पर्वतकार हांचीं भाशणां जालीं. ह्या वेळार मायंड टू हार्ट हे पुस्तिकेचें लोकार्पण जालें. शिक्षण मळार आतां बदल जायत आसा. अभ्यासक्रम जसो बदलता तसो विद्यार्थ्यां वयलो ताण वाडत आसा. हाका लागून आतां समुपदेशन म्हत्वाचें थारता. दिसान दीस समुपदेशकांची जापसालदारकी वाडटली. हाका लागून सेगीत शिक्षण तशेंच प्रशिक्षण जावपाची गरज आसा, अशें संचालक शैलेश झिंगडे हांणी सांगलें. डॉ. राजलक्ष्मी हांणी ‘द यंग मायंड अॅण्ड मोबायल’ ह्या विशयाचेर मार्गदर्शन केलें. समुपदेशनाचीं मुल्यां ह्या विशयाचेर डॉ. जॅनेट फर्नांडीस हांचें उलोवप जालें. वेनीफ्रीडा रॉड्रिग्ज हांणी सुत्रनिवेदन केलें. आस्लेशा शेट्ये हांणी कार्यशाळेचें वेवस्थापन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
