भांगरभूंय | प्रतिनिधी
ग्लोबल रोमी लिपी अभियानाची मागणी
मडगांव : गोंयांतल्या शिक्षणीक अभ्यासक्रमांत रोमी लिपीचो आसपाव करचो. तशेंच अल्पसंख्याक आयोगाची स्थापना करची, अशी मागणी ग्लोबल रोमी लिपी अभियानान केली. ह्या दोनूय विधेयकांचेर येवपी विधानसभेंत थाराव संमत जावचे खातीर सर्वपक्षीय आमदारांची भेट घेतात, अशें सांगलें.
मडगांवां पत्रकार परिशद घेत ग्लोबल रोमी लिपी अभियाना वतीन रोमी लिपयेकूय संविधानांत सांगला तो हक्क मेळचो, अशी मागणी केली. ह्या वेळार अध्यक्ष केनेडी आफोन्सो, सचिव मायकल ग्रॅसिअस आनी हेर हजर आशिल्ले.
ह्या वेळार आफोन्सो हांणी सांगलें : विधानसभेच्या पावसाळी अधिवेशनाच्यो तारखो जाहीर जाल्यात. ग्लोबल रोमी लिपी अभियाना कडल्यान रोमी लिपीचो शिक्षणीक अभ्यासक्रमांत वापर करचो आनी राज्यांत अल्पसंख्यांक आयोगाची निर्मिती करची, अशो दोन मागण्यो केल्यात.
सर्वपक्षीय आमदारांची भेट घेवन, ई मेला वरवीं तांकां निवेदनां सादर करतात. रोमी लिपयेचो वापर गोंयांत साडेचारशें वर्सां आदीं सावन जाता. हाका लागून संविधानान दरेके भाशेक दिल्लो हक्क आनी अधिकार रोमी पियेकूय मेळचो. हाका लागून येवपी विधानसभेंत ह्या दोनूय मागण्यांचेर विधेयकां सादर करून थाराव संमत करपाची मागणी तांणी केली.
शिक्षणीक अभ्यासक्रमांत वापरा खातीर दुसरी मेरेनचे रोमी लिपींतल्या पाठ्यपुस्तकांची निर्मिती केल्ल्यान अंदूं वर्साचे निमाणे मेरेन तिसरी मेरेनच्या पुस्तकाचीय निर्मिती करतले, अशें सांगलें.
फाटलीं ३३ वर्सां एकाय सत्ताधारी सरकारान अल्पसंख्यांक आयोगाच्या निर्मितीचेर लक्ष दिवंक ना. २०१२ वर्सा भाजपान जाहीरनाम्यांत ह्या मुद्द्याचो आसपाव केल्लो. मात त्या मुद्द्या विशीं कांयच हालचाल जावंक़ ना. अल्पसंख्याक आयोगाची स्थापना जाल्यार अल्पसंख्याक समाजाचे सोडोवपाक आनी भाशेक न्याय मेळपाकूय गरजेची मजत जातली अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
