शिक्षणा वांगडाच खोस दिवपी उपक्रम गरजेचे

भांगरभूंय | प्रतिनिधी

विन्सेंट बार्बोझा : वाळपय अवर लेडी ऑफ लुर्डस हायस्कुलांत पतंग महोत्सव

भांगरभूंय । प्रतिनिधी

वाळपय : भुरग्यांक शिक्षणा वांगडाच खोस निर्माण करपी उपक्रम चालीक लावप गरजेचें आसतात. अश्या उपक्रमांच्या माध्यमांतल्यान भुरग्यांक शिक्षणांत खूब बरो फायदो जाता. भुरगीं खूब आवडीन शिकतात, पूण शिक्षणा वांगडाच अणभव लेगीत तितलोच म्हत्वाचो आसता. हे खातीर वेगवेगळे तरेचे उपक्रम चालीक लावन भुरग्यांक सेगीत उर्बा दिवप गरजेचें आसा, अशें वाळपय अवर लेडी ऑफ लुर्डस हायस्कुलाचे वेवस्थापक विन्सेंट बार्बोझा हांणी सांगलें.

वाळपयच्या अवर लेडी ऑफ लुर्डस हायस्कुलांत हिरक महोत्सवी वर्सा निमतान शालेय विद्यार्थ्यां खातीर पतंग महोत्सवाचें आयोजन केल्लें. ह्या वेळार आयोजीत केल्ले कार्यावळींत बार्बोझा उलयताले.

विद्यार्थ्यांनी वेगवेगळ्या आकारांचे, रंगांचे आनी वेगवेगळे संदेश दिवपी पतंग तयार केल्ले. सुमार 110 भुरग्यांनी ह्या महोत्सवांत प्रत्यक्ष वांटो घेतलो. महोत्सवाची सुरवात शाळेचे मुख्याध्यापक वेवस्थापक विन्सेंट बार्बोझा हांचे हस्तुकीं फीत कांपून जालें. ह्या वेळार शाळेचे मुख्याध्यापक फादर रॉबर्ट फर्नांडीस, सहमुख्याध्यापिका ब्रेंडा हेरिडिया, ज्येश्ठ शिक्षक हरीश कामत आनी अजय गोवेकार हाजीर आशिल्ले.

बार्बोझा हांणी सांगलें, वाळपय अवर लेडी विद्यालयांत अशे तरेचे विवीध उपक्रम चालीक लायतात. ताका पालकांचो बरो तेंको मेळटा. तशेंच शिक्षक मेहनतीन अशे तरेन उपक्रम आयोजीत करपाचेर भर दितात. विद्यार्थ्यांक वेगवेगळ्या उपक्रमांतल्यान खोस मेळची आनी ताचो बरे तरेन फायदो शिक्षणांतल्यान जावचो, हो ताचे फाटलो खरो उद्देश आसता.

शिक्षक हरीश कामत हांणी मकर संक्रांत आनी पतंग महोत्सवाचें म्हत्व सांगलें आनी प्रास्तावीक केलें. शिक्षक अजय गोवेकार आनी निलेश नायक हांणी सर्तीचें परिक्षण केलें. फादर विन्सेंट बार्बोधा, फादर रॉबर्ट फर्नांडीस, प्राचार्य सुनिता कोंसेसांव आनी ब्रेंडा हेरिडिया हांचे हस्तुकीं जैतवंतांक इनामां भेटयलीं. महोत्सवाचें सुत्रसंचालन शिक्षिका आशिया वाळके हांणी केलें. महोत्सव येसस्वी करचे खातीर शिक्षिका वेलेंसिया, स्नेहा नायक आनी शिक्षक जोवन डिसोझा हांणी मेहनत घेतली. ह्या वेळार विद्यार्थ्यांचे पालक हाजीर राविल्ले.