शिक्षणा खातीर परदेशांत पयशे धाडपाचेर आतां टीसीएस ना

भांगरभूंय | प्रतिनिधी

नवी दिल्ली : तुमचें भुरगें परदेशांत शिकता आनी तुमकां ताका पयशे धाडपाचे आसल्यार काळजी करपाची गरज ना. आतां शिक्षणा खातीर पयशे धाडपाचेर लायिल्लो कर व्हड प्रमाणांत वाटोवंक मेळटा. अर्थ मंत्रालयान हालींच सांगिल्लें की 7 लाख रुपया मेरेन खंयचोच टीसीएस (टॅक्स कलेक्शन एट सोर्स) लागू जावचो ना. ते उपरांत लोकांच्या मनांत प्रस्न आशिल्लो की शिक्षणा खातीर पयशे धाडले तर कर उणो जातलो काय?
शिक्षणा खातीर परदेशांत पयशे धाडपा खातीर टीसीएस फारीक करचें पडना. पालकांक परदेशांत शिकपी भुरग्यांक शिक्षण संबंदीत खर्च भरपा खातीर पयशे धाडपाक परवानगी दिता. एलआरएसा खाला पालकांक अर्थीक वर्सा 2,50,000 डॉलर मेरेन धाडूंक मेळटा. पालकांक थारायिल्ले मर्यादे परस चड पयशे धाडपाचे आसल्यार रिझर्व्ह बँके कडल्यान परवानगी घेवची पडटा.

परदेशांत शिक्षणा खातीर पयशे धाडपा खातीर टीसीएस खातीर अर्ज कसो करचो? एलआरएस खाला पालकांक टीसीएसा बगर शिक्षण संबंदीत खर्चा खातीर वर्साक 7 लाख रुपया धाडूंक मेळटात. परदेशांतल्या शिक्षणा खातीर रेमिटन्स 7 लाख रुपया मर्यादे परस चड आसल्यार आनी मान्यताय मेळिल्ल्या वित्तीय संस्थे कडल्यान रिणाच्या माध्यमांतल्यान अर्थीक आदार घेतल्यार 0.05 टक्के टीसीएस वसूल करतले. रिणां भायर 7 लाखां वयर शिक्षणीक उद्देशां खातीर धाडल्यार 5 टक्के टीसीएस लागतलो.

समजा तुमी एका अर्थीक वर्सा एलआरएस खाला शिक्षण घेवपा खातीर 9,00,000 रुपया परदेशांत धाडल्यात. शिक्षणीक रिणा वरवीं पयशे घेवंक नात जाल्यार 7 लाखां वयर रक्कमेचेर 5 टक्के टीसीएस वसूल करतले. म्हणल्यार, ह्या प्रकरणांत टीसीएस रक्कम {(9,00,000- 7,00,000)*5/100}=रु. 10 हजार आसतले.
भुरग्यांच्या शिक्षणा खातीर एलआरएस वरवीं पयशे धाडपाचें टीसीएसचे सध्याचे हे दर आसात. टीसीएसचे उच्च दर 1 ऑक्टोबर 2023 सावन लागू जातले. पूण शिक्षणाच्या खर्चाचो विचार केल्यार ह्या काळा उपरांत कसलोच बदल जावचो ना. पूण शिक्षणीक खर्चाच्या भायर जे पयशे धाडटले, ते विशीं मात वेगळे नेम आसूं येतात.