भांगरभूंय | प्रतिनिधी
थोडे बेकायदो अमेरिकेंत वतात, थोडे कॅनडांत कायमचे रावपा खातीर
नवी दिल्ली, खबरां संस्था ः शिक्षणाखातीर कॅनडाक वचपी भारतीय विद्यार्थ्यांचो आंकडो चड आसा. मजगतीं, इमिग्रेशन, रेफ्युजीज अँड सिटिझनशिप कॅनडाच्या अहवाला प्रमाण मार्च आनी एप्रिल 2024 वर्सा कॅनडांतल्या कॉलेजींनी वा विद्यापिठांनी नांव नोंद करूंक नाशिल्ल्या विद्यार्थ्यांचो आंकडो व्हड आसा. वट्ट 50,000 आंतरराष्ट्रीय विद्यार्थ्यां मदीं 20,000 भारतीय आसात. एकंदरीत अभ्यास परवाने दिल्ल्या वट्ट विद्यार्थ्यां मदीं विद्यालयात नांव नोंद करिनाशिल्ल्या विद्यार्थ्यांचो आंकडो 6.9 टक्के आसा.
हो डेटा इंटरनॅशनल स्टूडंट कम्पायन्स रिजीम खाला एकठांय केला. जांतूत अभ्यास परवान्या संबंदी (study permits) नेमांचे पालन करतात हें निश्चित करपा खातीर शिक्षणीक संस्थांक वर्सांक दोन फावटीं नोंदणी अहवाल दिवचो पडटा.
ह्या अहवाला प्रमाण, 144 देशांतल्या विद्यार्थ्यांचो नियाळ घेतलो, ताचे प्रमाण वेगवेगळ्या देशांतल्या विद्यार्थ्यांची शिक्षणीक संस्थांनी प्रवेश मेळपाची टक्केवारी वेगवेगळी आसा. 668 विद्यार्थी (2.2 टक्के) फिलीपीन्सांतले आनी 4,279 (6.4 टक्के) चीनांतले आसात जें नोंदणी केल्ल्या शिक्षणीक संस्थेंत रूजू जावंक नात. इराणांतल्या विद्यार्थ्यां खातीर हें प्रमाण खूब चड (11.6 टक्के) आसा. रवांडाच्या 48.1 टक्के विद्यार्थ्यांनी प्रवेश घेतिल्ल्या शिक्षणीक संस्थेंत रूजू जावंक नात.
अभ्यास परवानो घेवन कॅनडाक गेल्ले कांय भारतीय विद्यार्थी बेकायदेशीर रितीन अमेरिकेंत प्रवेश करतात, असो गंभीर आरोप आसा. शिक्षणीक संस्थांनी रूजू जावंक नाशिल्ले चडशे भारतीय विद्यार्थी कॅनडांतच उरल्यात अशें आदले फेडरल इकॉनॉमिस्टआनी इमिग्रेशन तज्ञ हेन्री लोटीन हांणी ‘द ग्लोब अँड मेल’ कडेन उलयतना सांगलें. तशेंच कॅनडांत कायमचे रावपाच्या ध्येयान ते वावुरतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
