भांगरभूंय | प्रतिनिधी
युनायटेड नेशन्स संघटनेच्या युनिसेफान केल्ल्या सर्वेक्षणांतल्यान स्पश्ट
न्यूयाॅर्क, खबरां संस्था ः भारतीय बायलांक शिक्षण घेतले उपरांत रोखडेंच लग्न जावचे बदला नोकरी करप म्हत्वाचें दिसता अशें युनायटेड नेशन्स संघटनेच्या युनिसेफान (युनायटेड नेशन्स इंटरनॅशनल चिल्ड्रन इमर्जन्सी फंड) हालींच केल्ल्या सर्वेक्षणांतल्यान दिसून आयलां. लग्नापरस नोकरी करपाक प्राधान्य दिवप म्हळ्यार बायलांक स्वताच्या पांयांचेर उबे रावपाची इत्सा आशिल्ल्याचे दिसून येता.
दादल्यांनी काम करचें वा वेवसाय करचो, पयशे जोडचे आनी बायलांनी घराची जतनाय घेवची, हो प्रकार आमच्या समाजांत खूब आदीं अस्तित्वांत आशिल्लो. सुरवाती सावन दादल्यांकच घरांत चड मान आशिल्लो. कारण घरांत तो एकलोच कमवपी मनीस आसतालो. आनीक एक कारण म्हळ्यार पयलीं बायलांक शिक्षण मेळ नाशिल्ले. बायलांनी फकत ‘चूल आनी मूल’ हेच काम करचे अशी अपेक्षा आशिल्ली. ताका लागून भारतीय बायलांची एकंदरीत समाजीक आनी बौध्दिक उदरगत जावंक शकली ना, पूण आतां काळ बदलला. आयज चलयेक शिकून नोकरी मेळपाची इत्सा आसता. चलयांक स्वतंत्र रावपाक आवडटा. ही गजाल ह्या सर्वेक्षणांतल्यान स्पश्टपणान दिसून आयलां.
UNICEF च्या सर्वेक्षणांत कितें सांगलें?
नोकरीच्या मळार बायलांचो वांटो विचारांत घेवन UNICEF न सर्वेक्षणांतल्यान तरणाट्यांचें मत जाणून घेतलें. UNICEF चो युवा प्लॅटफॉर्म ‘युवा’ आनी यू-रिपोर्टान केल्ल्या ह्या सर्वेक्षणांत भारतभरांतल्या 18 ते 29 वर्सां पिरायेच्या 24 हजारां परस चड तरणाट्यांनी वांटो घेतिल्लो. 75 टक्के तरणाटे आनी दादले बायलांनी शिक्षण घेतले उपरांत नोकरी करप म्हत्वाचें अशें मानतात अशें ह्या सर्वेक्षणांतल्यान स्पश्ट जालां.
नोकरी काय लग्न?
चलयेचें शिक्षण जाले उपरांत नोकरी आनी लग्न ह्यो दोन म्हत्वाच्यो गजाली नदरेक येतात. जिणेंतल्या त्या त्या पांवड्यार ह्यो दोनूय गजाली म्हत्वाच्यो. शिक्षणा उपरांत नोकरी करपी बायलां वा शिक्षण उपरांत लग्नाक प्राधान्या दिवपी बायलां वा लग्न जाले उपरांत काम करपी बायलो वा घरगुती जापसालदारकेक लागून लग्न जाले उपरांत नोकरी सोडपी बायलो आमी पळयलां.
भारतांत पयलीं बायलांक शिक्षणा खातीर खूब संघर्श करचो पडटालो. शिक्षण पुराय आसूं वा अपूर्ण आसूं चलयेचें बेगीनाच लग्न करताले. पूण, आतां परिस्थिती बदलल्या. बायलांक आत्मनिर्भरतायेचें म्हत्व कळ्ळां. बायलां शिकून अर्थीक नदरेन सक्षम जावपा खातीर नोकऱ्यांक चड म्हत्व दिवपाक लागल्यात. ती स्वताच्या पांयांचेर उबी रावता आनी मागीर लग्न जावपाचें थारायता. देखून बायलांक अर्थीक स्वातंत्र्य मेळटा आनी घोवाचेर आदारून रावपाची गरज पडना. देखूनच आयज बायलो दर एका मळार दादल्यां सारकेच नोकरी वा वेवसाय करताना दिसतात.
बायलांनी नोकरी करप हें दादल्यांक म्हत्वाचें दिसता…
युनिसेफाच्या एका सर्वेक्षणांतल्यान अशें दिसून आयलां की, 75 टक्के तरणाटे आनी दादले शिक्षण उपरांत नोकरी बायलां खातीर म्हत्वाची अशें मानतात. तोखणायेची गजाल म्हळ्यार शिक्षणा उपरांत बायलांनी नोकरी करप हें दादल्यांक म्हत्वाचें दिसता. आयज जायते दादले लग्न करचें पयलीं चली नोकरी करता काय अशें विचारतात. घर सोडून नोकरी खातीर दुसऱ्या शारांत रावपी तरणाटे काम करपी चलयेक बायल म्हणून निवडपाक प्राधान्य दितात. अर्थीक जापसालदारक्यो वांटून घेवपाक तांकां चड सोयीचें आसता. देखून लग्न जाले उपरांत घर, भुरग्यांचें शिक्षण आदी ल्हान व्हड जापसालदारक्यो एकठांय येवन सहजपणान पुराय करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
