शिक्षणाच्या मुख्य प्रवाहांत ‘खेळ’ जाय

भांगरभूंय | प्रतिनिधी

खंयचोय देश मुखार सरतलो जाल्यार युवा पिळगेचो वांटो खूब म्हत्वाचो थारता. ताका लागून आमी शिक्षणीक मळार फक्त पाठ्यपुस्तकांतलें शिक्षण शिकोवप गरजेचें थारना. जाल्यार आमी भुरग्यांक पाठ्यपुस्तकां भायर आयज शिकोवपाची गरज आसा. पयलो विशय म्हळ्यार खेळ. आयज खेळांतल्यान भुरग्यांचो फुडार घडोवपाक शकतात, हें चडांत चड आवय बापायक खबर ना. कारण पयलीं सावन तांची मानसीकताय अशीं जाल्लीं आसा की, फक्त शिक्षण शिकून भुरगो व्हड जाता. शिक्षण हें गरजेचेंच. ना अशें न्ही, पूण आतां काळ बदल्ला. ताका लागून जसो काळ बदलता तशे आमी बदलपाची गरज आसा. आयज आमी पळयतात आमच्या देशांत शिक्षणीक मळार खेळाचें म्हत्व तितलेंच उरलां, जितलेंच खंयच्याय खेळाक बारावो खेळगडो आसता ताचे सारकें.
खेळ म्हणलो की दोळ्यां मुखार येता तें म्हळ्यार क्रिकेट. ताचें आयज व्यवसायीक पावंड्यार कितलें म्हत्व वाडला आनी कितलेश्याच भुरग्यांनी आपलो फुडार ह्या खेळांतल्यान घडयला. उदाहरण दिवपाक म्हळ्यार पुराय देशाचो आवडटो खेळगडो विराट कोहली. जाचें शिक्षण फक्त बारावी मेरेन जालां. पूण, आतां तांणें संवसारातलो सगळ्यांत बरो क्रिकेटर म्हूण नामना मेळयल्या. फक्त क्रिकेट कित्याक, फुटबॉल, कबड्डी, हॉकी सारकिल्ल्या खेळांनी पसून आमी आमच्या भुरग्यांक ओड निर्माण करपाक जाय. कांय दिसा फाटीं पळयलें की भारतांतले चडांत चड लोक फुटबॉलाक अर्जेंटिना ह्या देशाक तेंको दिताले. भारत देश हो 135 कोटी लोकांचो देश आनी तातूंत सगळ्यांत चड युवा पिळगी आशिल्लो‌. जाल्यार हो देश फुटबॉल सारक्या खेळांत संवसारीक पांवड्यार कित्याक फाटीं आसा? हाचो आमी विचार करपाची गरज आसा. कारण आमी पयलीं सावन शाळेंत वा घरांत खेळ हें फक्त मन रिजोवपाचें साधन म्हूण पळयलें. ताका लागून आज क्रिकेट सोडल्यार हेर खेळांनी आमचो देश मुखार सरिल्लो पळोवपाक मेळना. अमेरिका सारक्या देशांनी तर केन्ना सावन आपल्या मुख्य शिक्षणीक प्रवाहांत खेळ आस्पावन घेतिल्लो दिसता ताका लागून ऑलिंपीक सारक्या खेळांनी हो देश सदांच मुखार आसता.
सरकारान कांय दिसां पयलीं नवें शिक्षणीक धोरण लागू केलां. त्या धोरणाक धरून खेळ ही फक्त मनरिजवण न्हय तर तो वेवसायीक नदरेन शिकोवपाची गरज आसा. ताका लागून खेळाक आयज शिक्षणाच्या मुख्य प्रवाहात आस्पावन घेवपाक जाय.

गौतम पागी
9637181710